დაგროვებითი პენსიის სისტემა ამბიციური პროექტია, - ამის შესახებ „ბანკების ასოციაციის“ პრეზიდენტმა, ალექსანდრე ძნელაძემ განაცხადა.

მისივე თქმით, გრძელვადიანი რესურსი, რომელიც დასაქმებულის, დამსაქმებლის და სახელმწიფოს 2-2%-იანი დანაზოგების აკუმულირებით შეიკრიბება და სტიმული გახდება ქართული კაპიტალის, ასევე ფასიანი ქაღალდების ბაზრის შემდგომი განვითარებისთვის.

„მიუხედავად 40 წელს გადაცილებული მოქალაქეების ნებაყოფლობითობისა, ჩაერთონ თუ არა საპენსიო სქემაში, დარწმუნებული ვართ, რომ დასაქმებულთა უმეტესი ნაწილი დადებითად გადაწყვეტს აღნიშნულ საკითხს. სახელმწიფოს მზაობა, გრძელვადიანი პერიოდის განმავლობაში დააბანდოს გადასახადებიდან შემოსული თანხის ნაწილი მოქალაქეების უზრუნველი სიბერის უზრუნველსაყოფად, მისასალმებელია, დარწმუნებული ვართ, უახლოეს პერიოდში ვიხილავთ არაერთ ინიციატივას, რომელიც ასევე მოიცავს თვითდასაქმებულების და უმუშევრების საპენსიო სქემების დააახლოებას დასაქმებული პირების დაგროვებით პენსიასთან", - განაცხადა „ბანკების ასოციაციის“ პრეზიდენტმა.