რამდენიმე კვირაში როგორც კერძო, ასევე სახელმწიფო უნივერსიტეტებს მაღალი ხარისხის სამეცნიერო რესურსებთან უფასო წვდომა ექნებათ, - ამის შესახებ განათლების, მეცნიერების, კულტურისა და სპორტის მინისტრმა მიხეილ ბატიაშვილმა განათლების სისტემის რეფორმის პრეზენტაციაზე განაცხადა. მისი თქმით, სახელმწიფოს მიერ ამ რესურსის შესყიდვა მოხდება.

"სახელმწიფო უზრუნველყოფს, რომ რამდენიმე კვირაში ჩვენს უნივერსიტეტებს, სახელმწიფოსაც და კერძოსაც, მაღალი ხარისხის სამეცნიერო რესურსებთან ჰქონდეს უფასო წვდომა. ეს არის ასიათასობით ღირებულების რესურსი, რომელიც ბევრ შემთხვევაში ჩვენი საგანმანათლებლო ინსტიტუტებისთვის ხელმისაწვდომი არაა. ამიტომ, სახელმწიფომ ფაქტობრივად დაასრულა მუშაობა, რათა ამის ცენტრალიზებულად შესყიდვა მოახდინოს და ყველა უნივერსიტეტს, ყველა მკვლევარს ჰქონდეს შესაძლებლობა, უფასოდ ისარგებლოს ამ რესურსით. აქ არის თავმოყრილი მთელი მსოფლიოს ცოდნა, მსოფლიო კვლევების გამოცდილება და ფაქტობრივად, გაზაფხულიდან ასეთი ცოდნა ყველა ადამიანისთვის ხელმისაწვდომი გახდება,"- განაცხადა მინისტრმა.