ვიდრე კარგად არ გავეცნობი იმ მოთხოვნას, რაც მალხაზ მაჩალიკაშვილს წერილში აქვს, საჯარო პოზიციის დაფიქსირებას მოვერიდებოდი, - ამის შესახებ ფრაქცია „ქართული ოცნების" თავმჯდომარემ მამუკა მდინარაძემ ჟურნალისტებს განუცხადა.

„მე ჯერ არ მიმიღია ეს წერილი, რამდენიმე წუთის წინ თქვენმა კოლეგამ ტელეფონში მაჩვენა. ასე უცებ არ შეიძლება პასუხი გავცე. მე ამ წერილს აუცილებლად გავეცნობი, ზოგადად ვიცი, რომ ეს არის ძალიან მტკივნეული თემა. როდესაც გარდაცვლილ ადამიანზეა საუბარი, ყოველთვის ძალიან უხერხულია ასეთ თემებზე საუბარი. თუმცა, არის გარკვეული საგამოძიებო თემები, რომლის დეტალებზე წვდომაც არ გვაქვს ხოლმე და ამ დეტალებზე მასობრივი საშუალებებით საუბარი შეიძლება არ იყოს სწორი. მე მოვერიდებოდი ამაზე საჯარო პოზიციის დაფიქსირებას, ვიდრე კარგად არ გავეცნობი იმ მოთხოვნას, რაც წერილში აქვს მალხაზ მაჩალიკაშვილს", - განაცხადა მამუკა მდინარაძემ.

პანკისის ხეობაში სპეცოპერაციის დროს მოკლული თემირლან მაჩალიკაშვილის მამამ, მალხაზ მაჩალიკაშვილმა პარლამენტში 150 დეპუტატის სახელზე მიმართვა შეიტანა. მალხაზ მაჩალიკაშვილი მოითხოვს, რომ თემირლან მაჩალიკაშვილის საქმეზე პარლამენტის დროებითი საგამოძიებო კომისია შეიქმნას.