შს მინისტრის მოადგილე - ფარულ ჩანაწერებთან დაკავშირებით გამოძიებაში პრიორიტეტს პირველწყაროზე გასვლა წარმოადგენს

შინაგან საქმეთა მინისტრის მოადგილის, ვლადიმერ ბორცვაძის განცხადებით, ფარულ ჩანაწერებთან დაკავშირებით, გამოძიება ინტენსიურ რეჟიმში, არაერთ ვერსიაზე მუშაობს. აღნიშნულის შესახებ მან ჟურნალისტებს შსს-ს დროებითი მოთავსების უზრუნველყოფის დეპარტამენტის 2018 წლის ანგარიშის პრეზენტაციის დაწყებამდე განუცხადა.

როგორც ბორცვაძე განმარტავს, გამოძიებისთვის პრიორიტეტს პირველწყაროზე გასვლა წარმოადგენს, რომელმაც ფარული ვიდეოჩანაწერი გაავრცელა.

„ნომერ პირველი პრიორიტეტი ამ სისხლის სამართლის საქმეში არის ზუსტად ის, რომ გავიდეთ პირველწყაროზე, თუ ვინ გაავრცელა ეს ჩანაწერი. გამოძიება გრძელდება, გრძელდება ასევე ოპერატიულ-სამძებრო ღონისძიებები, გაგვაჩნია არაერთი ვერსია, მივდივართ არაერთი მიმართულებით, დაველოდოთ გამოძიებას", - განაცხადა ბოცვაძემ.

კითხვაზე, 2016 წელს, როცა ფარული ვიდეოჩანაწერები გავრცელდა, ჩატარდა თუ არა შესაბამისი საგამოძიებო ღონისძიებები, შს მინისტრის მოადგილე პასუხობს, რომ აღნიშნული საქმეც გადამოწმდება.

„ამ სისხლის სამართლის საქმესთან დაკავშირებით, კომენტარს ვერ გავაკეთებ. რა თქმა უნდა, ამ სისხლის სამართლის საქმეზე ჩატარებული საგამოძიებო მოქმედებები გადამოწმდება, გადამოწმების საფუძველი არსებობს და გადავამოწმებთ გარკვეულ ვერსიებს, შევისწავლით ძველი საქმის მასალებს. გამოძიებას დაველოდოთ, საგამოძიებო მოქმედებები ინტენსიურად ტარდება", - აცხადებს ბორცვაძე.

თუ სად და ვისთან ინახებოდა ფარული ვიდეოჩანაწერები, შს მინისტრის მოადგილე აღნიშნულთან დაკავშირებით აცხადებს, რომ ეს გამოძიების საგანია.

პაატა ზაქარეიშვილი - რუსეთი ცხინვალის რეგიონში აქტიურობით ცდილობს აიძულოს საქართველო რაღაც ფორმით გადავიდეს მოსკოვთან დიალოგის ფორმატზე
ქართული პრესის მიმოხილვა 16.09.2019
მეთიუ ბრაიზა - დიდი პრობლემაა, რომ დონალდ ტრამპი ხშირად არც კი უსმენს მის მთავარ მრჩევლებს, რომლებიც ამბობენ - „ყურადღება მიაქციეთ საქართველოს“
დენიელ ფრიდი - ამერიკა არც „პროსააკაშვილურია“ და არც „პროივანიშვილური“, ჩვენ საქართველოს მხარეს ვართ
სუპერმარკეტების ქსელი „მაგნიტი“ გრანდიოზულ წამახალისებელ გათამაშებას იწყებს
გალფი ტურისტული ზონების დასუფთავების მასშტაბურ აქციას იწყებს