დიმიტრი პესკოვი - კრემლი ნიკოლას მადუროს ვენესუელიდან შესაძლო გამოყვანის კუთხით არანაირ სამუშაოებს არ აწარმოებს

კრემლი არანაირ სამუშაოებს არ აწარმოებს ნიკოლას მადუროს ვენესუელიდან შესაძლო გამოყვანის კუთხით, - ამის შესახებ ჟურნალისტებს რუსეთის პრეზიდენტის პრესმდივანმა დიმიტრი პესკოვმა განუცხადა.

კითხვაზე, რომ ვენესუელაში შიდაპოლიტიკური კრიზისის გამო სხვა სახელმწიფოები შეთავაზებით გამოდიან, უზრუნველყონ ნიკოლას მადუროს ხელშეუხებლობა და მისი ქვეყნიდან გაყვანა, დიმიტრი პესკოვმა უპასუხა, რომ „ეს საკითხი არ დგას დღის წესრიგში და ამ კუთხით არანაირი ნაბიჯები არ იდგმება“.

„კრემლის პოზიცია არ შეცვლილა. ჩვენ მხარს ვუჭერთ ვენესუელას პრეზიდენტს ნიკოლას მადუროს“, - აღნიშნა მან.

მისივე თქმით, მოსკოვი და ვაშინგტონი არ განიხილავენ ვენესუელის კრიზისის დარეგულირების საკითხს და ამ თემასთან დაკავშირებით მხარეებს შორის კონტაქტი არ არის.