ჩვენი კოლეგები პროგნოზირებდნენ, რომ ცოტა გაჭირდებოდა ამხელა სამინისტროს მართვა. რა პრობლემები დაგხვდათ ამ მიმართულებით? - ამ კითხვით ფრაქცია „ქართული ოცნების“ თავმჯდომარე მამუკა მდინარაძემ განათლების მინისტრს, მიხეილ ბატიაშვილს პარლამენტის პლენარულ სხდომაზე მიმართა.
მდინარაძე დაინტერესდა, სამინისტროების გაერთიანების შედეგად რა პრობლემები გამოიკვეთა მენეჯმენტის თვალსაზრისით.
„ბატონო მიხეილ, ალბათ, გახსოვთ, როდესაც სამინისტროების გაერთიანებაზე იყო საუბარი, მაშინ ჩვენთან გუნდში სერიოზული აზრთა სხვადასხვაობა იყო. ეს არ დაგვიმალავს და მართლაც, არგუმენტები ერთ მხარესაც და მეორე მხარესაც საკმაოდ მყარი იყო. ამ არგუმენტების მიხედვით, ჩვენი კოლეგები პროგნოზირებდნენ, რომ ცოტა გაჭირდებოდა ამხელა სამინისტროს მართვა, თუნდაც მენეჯმენტის თვალსაზრისით. განათლება, მეცნიერება, კულტურა, სპორტი - მართლაც ძალიან დიდი სფერო გამოდის საერთო ჯამში.
ახლა, როდესაც აღარ ხართ ახალი მინისტრი, რა პლუსები და მინუსები, რა პრობლემები და გამოწვევები დაგხვდათ ამ მიმართულებით? მენეჯმენტის თვალსაზრისით რამდენად შესაძლებელია ამ სამინისტროს მართვა?“ - ჰკითხა მამუკა მდინარაძემ მინისტრს.