კონგრესში წარდგენილი რეზოლუცია იქნება გამზადებული ფონი, რომლითაც ადამიანები გაიგებენ, თუ რატომ უნდა მისცენ ხმა ქართულ-ამერიკული ურთიერთობის მხარდამჭერ კანონპროექტს, - ამის შესახებ ფლორიდის წარმომადგენელმა კონგრესმენმა, ფრანცის რუნიმ განაცხადა.

„ამერიკის ხმის“ ქართული ბიუროს ინფორმაციით, რუნიმ კონგრესს რეზოლუცია წარუდგინა, რომელიც სირიის მიერ საქართველოს ორი რეგიონის, აფხაზეთის და სამხრეთ ოსეთის/ცხინვალის რეგიონის დამოუკიდებელ ქვეყნებად აღიარებას გმობს.

კონგრესმენმა ამერიკა-საქართველოს ურთიერთობას მაღალი შეფასება მისცა და ახალი რეზოლუციის მნიშვნელობაზე ისაუბრა.

„ჩავთვალე, რომ საქართველოს სუვერენიტეტის შესახებ ხმამაღალი განცხადება უნდა გაგვეკეთებინა. ჩვენს წინაშე არსებული პრობლემის გამო, რომელიც რუსების მიერ აფხაზეთში და სამხრეთ ოსეთში/ცხინვალის რეგიონში გაყინული კონფლიქტების ზონების შექმნით არის წარმოშობილი. ჩვენ არ შეგვიძლია ამას ოდესმე დავეთანხმოთ და ბრძოლას გავაგრძელებთ, ვიმუშავებთ იმისთვის, რომ ყველა შესაძლო გზით საქართველოს პარტნიორობა გავუწიოთ. ჩვენ დიდად ვაფასებთ იმ პროგრესს, რომელიც საქართველოს, დამოუკიდებლობის მოპოვების შემდეგ, 26 წლის განმავლობაში ჰქონდა. ბევრი რამ გვაქვს საერთო, ნატო-სთან, ვაჭრობის შესაძლებლობებთან დაკავშირებით; იმის შესაძლებლობა, რომ პირდაპირ რუსეთის კართან კაპიტალიზმის პლაცდარმი გვქონდეს. ეს შეერთებული შტატებისთვის ძალიან მნიშვნელოვანია. შეერთებული შტატების სახით თქვენ ძალიან კარგი მეგობარი გყავთ“, - განაცხადა რუნიმ.

მისივე თქმით, აღნიშნული რეზოლუციით საქართველოს მძიმე მდგომარეობის, იმ საფრთხეების ცნობადობა ამაღლდა, რომელსაც რუსეთი უქმნის საქართველოს.

„როდესაც საქმე კონკრეტული საკითხების კენჭისყრაზე მიდგება, ეს რეზოლუცია იქნება ის გამზადებული ფონი, რომლითაც ადამიანები გაიგებენ, თუ რატომ უნდა მისცენ ხმა ქართულ-ამერიკული ურთიერთობის მხარდამჭერ კანონპროექტს“, - განაცხადა კონგრესმენმა.