გრძელდება მთავარი ინფრასტრუქტურული პროექტის დაფინანსება, რომელიც საბოლოო ჯამში შეაერთებს დასავლეთ და აღმოსავლეთ საქართველოს და წითელი ხიდიდან სარფამდე იქნება ჩქაროსნული გზა, - ამის შესახებ ჟურნალისტებს ფინანსთა მინისტრმა ივანე მაჭავარიანმა „ევროპის საინვესტიციო ბანკის“ მიერ 250 მილიონი ევროს გამოყოფის შეფასებისას განაცხადა.

მისივე თქმით, აღნიშნული თანხა მიზნობრივად რუსთავი-სადახლო და რუსთავი-წითელი ხიდი ავტომაგისტრალებს მოხმარდება.

“როგორც წესი, ერთ-ერთი ყველაზე შეღავათიანი სესხია ევროპის საინვესტიციო ბანკისგან. როგორც იცით, ეს არის ევროკავშირის ფინანსური ინსტიტუტი, უკვე მრავალი წელია მათთან ვთანამშრომლობთ. 250 მილიონ ევროზე მოხდა ხელშეკრულების დადება და დაფინანსდება მიზნობრივად რუსთავი-სადახლო და რუსთავი-წითელი ხიდის ავტომაგისტრალი, რაც მთავარი ე.წ. ხერხემლის ნაწილია. შესაბამისად, გრძელდება მთავარი ინფრასტრუქტურული პროექტის დაფინანსება, რომელიც საბოლოო ჯამში შეაერთებს დასავლეთ და აღმოსავლეთ საქართველოს და წითელი ხიდიდან სარფამდე იქნება ჩქაროსნული გზა“, - განაცხადა მაჭავარიანმა.