იურიდიული კომიტეტის თავმჯდომარე ანრი ოხანაშვილი არღვევს რეგლამენტს და ბიუროს გადაწყვეტილების აღსრულებას აფერხებს, - ამის შესახებ საპარლამენტო უმრავლესობის წევრმა ეკა ბესელიამ "ინტერპრესნიუსს" განუცხადა. ბესელიას განცხადებით, მას ამ დრომდე არ მიუღია იურიდიული კომიტეტის დასკვნა მის მიერ ინიცირებულ კანონპროექტზე, რომელიც პირველი და მეორე ინსტანციის სასამართლოში მოსამართლეთა უვადოდ დანიშვნის შეჩერებას გულისხმობს.
მისივე განმარტებით, ის ფაქტი, რომ კომიტეტის დასკვნას მას ანრი ოხანაშვილი ამ დრომდე არ უგზავნის, არის საკანონმდებლო პროცესის ხელოვნური შეფერხება.
"იურიდიული კომიტეტის თავმჯდომარე ანრი ოხანაშვილი არღვევს რეგლამენტს და ბიუროს გადაწყვეტილების აღსრულებას აფერხებს. ჩვენს კანონპროექტზე კომიტეტის დასკვნა მოვითხოვე და ამ დრომდე არაა გაგზავნილი კომიტეტის დასკვნა და მასალები. ბიუროს გადაწყვეტილებით, დაჩქარებული წესით იხილება ჩვენი კანონპროექტი მოსამართლეთა უვადოდ დანიშვნის შეჩერების თაობაზე. დაჩქარებული განხილვა ნიშნავს ერთ კვირაში 3 მოსმენით განხილვას. იურიდიულმა კომიტეტმა ორშაბათს (18 თებერვალს) ღამე უყარა კენჭი პროექტს. დასკვნა და კანონპროექტი ამ დრომდე არ აქვს გაგზავნილი კომიტეტის თავმჯდომარეს ანრი ოხანაშვილს. ეს არის საკანონმდებლო პროცესის ხელოვნური შეფერხება და ბიუროს მიერ განსაზღვრული ვადების დარღვევა,"- განაცხადა ეკა ბესელიამ.