ქირურგიის ეროვნულ ცენტრში მომხდართან დაკავშირებით, შინაგან საქმეთა სამინისტრომ გამოძიება 126-ე, ძალადობის მუხლით დაიწყო.

როგორც „ინტერპრესნიუსს“ შინაგან საქმეთა სამინისტროში განუცხადეს, საგამოძიებო მოქმედებების ფარგლებში გამოკითხეს ინციდენტში მონაწილე პირები, დანიშნულია შესაბამისი ექსპერტიზა.

ეგვიპტის მოქალაქე ვაგდია ელკორაე, რომლის მამაც ქირურგიის ეროვნულ ცენტრში მკურნალობს, დაცვის თანამშრომლებს ფიზიკური შეურაცხყოფის მიყენებაში ადანაშაულებს. ის აცხადებს, რომ მამამისს ექიმები სათანადო ყურადღებას არ აქცევენ და ამის გამო ჩივილს აპირებდა, რასაც მოჰყვა მის მიმართ ფიზიკური შეურაცხყოფა.

ქირურგიის ეროვნული ცენტრის წარმომადგენლები გავრცელებულ ინფორმაციას არ ეთანხმებიან. მათი თქმით, პაციენტის შვილი აგრესიული იყო.

კლინიკის წარმომადგენლებმა საპატრულო პოლიცია გამოიძახეს.