განათლების სამინისტრო  ახალი პროექტის პრეზენტაციას გამართავს

საქართველოს განათლების, მეცნიერების, კულტურისა და სპორტის სამინისტროში 26 თებერვალს პროექტის - BE MUSEUMER პრეზენტაცია გაიმართება.

როგორც ,,ინტერპრესნიუსს“ განათლების, მეცნიერების, კულტურისა და სპორტის სამინისტროდან აცნობეს, ღონისძიებას საქართველოს განათლების, მეცნიერების, კულტურისა და სპორტის მინისტრის მოადგილე ლევან ხარატიშვილი, მუზეუმების საერთაშორისო საბჭოს (ICOM) საქართველოს ეროვნული კომიტეტის პრეზიდენტი ინგა ქარაია, NEMO - ევროპის სამუზეუმო ორგანიზაციების ქსელის გენერალური მდივანი ჯულია პაგელი, ნიდერლანდების კულტურის მენეჯმენტის აკადემიის წარმომადგენელი ბიორნ სტენვერსი, აჭარის განათლების, კულტურისა და სპორტის მინისტრის მოადგილე თეონა ბერიძე, შემოქმედებითი საქართველოს დირექტორი ანა რიაბოშენკო და თბილისის სახელმწიფო სამხატვრო აკადემიის რექტორი გიორგი გუგუშვილი გაუძღვებიან.

უწყების ინფორმაციით, პრეზენტაციაზე ისაუბრებენ პროექტზე, მის ეტაპებსა და მნიშვნელობაზე, ასევე დასკვნით შედეგზე - სამუზეუმო სწავლების ცენტრზე, რომელიც თბილისის სახელმწიფო სამხატვრო აკადემიის ბაზაზე დაფუძნდება.

BE MUSEUMER წარმოადგენს ევროკავშირის პროგრამის შემოქმედებითი ევროპის კონკურსში გამარჯვებულ სამწლიან (2018-2021) პროექტს, რომლის მიზანია, სამხრეთ კავკასიის რეგიონში, სამუზეუმო სფეროს განვითარების ხელშეწყობა

პროექტის ფარგლებში საქართველოს, სომხეთის და აზერბაიჯანის მუზეუმების თანამშრომლებისთვის შემუშავდა საერთაშორისო ტრენინგ-პროგრამა, რომელიც მიზნად ისახავს მათ განათლებას და პროფესიული უნარ-ჩვევების განვითარებას 21-ე საუკუნის სამუზეუმო გამოწვევების საპასუხოდ.

BE MUSEUMER წარმოადგენს შემოქმედებითი ევროპის კონკურსში გამარჯვებულ პირველ პროექტს, რომლის ლიდერია ქართული ორგანიზაცია - საქართველოს მუზეუმების ასოციაცია ICOM საქართველოსთან თანამშრომლობით, ხოლო პარტნიორებს წარმოადგენენ ევროპული ორგანიზაციები: NEMO - ევროპის სამუზეუმო ორგანიზაციების ქსელი (გერმანია), ნიდერლანდების კულტურის მენეჯმენტის აკადემია.

პროექტის ფარგლებში, ევროპელ ექსპერტთა ხელმძღვანელობით, ჩატარდება ტრენინგები/სემინარები/ვებინარები სამუზეუმო სფეროს საკვანძო საკითხებზე (კერძოდ, მუზეუმის მისია/ფასეულობების განსაზღვრა, სამუზეუმო განათლების, მუზეუმის სოციალური და ეკონომიკური როლის საკითხები, მუზეუმი და ციფრული ტექნოლოგიები, სამუზეუმო მარკეტინგი, ფანდრეიზინგი, აუდიტორიის განვითარება, სამუზეუმო სერვისები, მასპინძლობა, ლიდერობა, სხვა.), მოეწყობა სასწავლო ვიზიტები სამხრეთ კავკასიის მუზეუმებში, აგრეთვე ევროპის - ამსტერდამისა და ბერლინის მუზეუმებში, ჩატარდება საერთაშორისო ფორუმები და სიმპოზიუმი ევროპელ და ქართველ ექსპერტთა მონაწილეობით. პროექტის ფარგლებში, ასევე განხორციელდება სამხრეთ კავკასიის სამუზეუმო სივრცის კვლევა-ანალიზი ევროპელ ექსპერტთა რეკომენდაციების საფუძველზე; შედეგები ელექტრონული სახით განთავსდება პროექტის ვებ-გვერდზე. გარდა ამისა, ევროპელ ექსპერტთა მიერ, ტრენინგ-პროგრამის ფარგლებში, შემუშავდება და გამოიცემა სასწავლო-მეთოდოლოგიური სახელმძღვანელოები, მონაწილეთა მიერ მომზადდება მცირე საპროექტო წინადადებები, ჩატარდება მცირეგრანტიანი პროექტების კონკურსი და სხვა.

პროექტის ფარგლებში, პირველი ტრენინგი ჩატარდება 2019 წლის 27 თებერვლიდან 1 მარტის ჩათვლით, სამუზეუმო განათლების თანამედროვე ტენდენციების, სწავლების მეთოდების, სამუზეუმო განათლების პოლიტიკის შემუშავების, მუზეუმის პედაგოგის როლისა და მნიშვნელობის საკითხებზე. ტრენინგს ჩაატარებს ექსპერტი მარგერიტა სანი - ემილია-რომანიას რეგიონის (იტალია) კულტურული მემკვიდრეობის ინსტიტუტის სამუზეუმო პროექტების მენეჯერი, NEMO-ს აღმ. საბჭოს წევრი, ევროპის სამუზეუმო აკადემიის ექსპერტი და ICOM/ICTOP-ის წევრი. ტრენინგში მონაწილეობას მიიღებს კონკურსის შედეგად შერჩეული 20 მონაწილე საქართველოს, სომხეთის და აზერბაიჯანის მუზეუმებიდან.

დავით ნარმანია - თუ არ გვინდა გაგვიძვირდეს ტარიფები, უნდა ავაშენოთ ჰესები
ქართული პრესის მიმოხილვა 22.10.2019
დიმიტრი შველიძე  -  მომავალი პარლამენტი ნაყიდი დეპუტატებით და ფრაქციებით აივსება
სასტუმრო „რადისონ ბლუ ივერიამ“ 10 წლის იუბილე აღნიშნა