ოკუპირებული აფხაზეთის დეფაქტო მთავრობამ რუსეთთან ხელშეკრულება გააფორმა, რომლის საფუძველზეც 27 თებერვლიდან ელექტროენერგიას რუსეთიდან მიიღებს, რაც დაკავშირებულია ენგურჰესის სადგურზე არსებულ კრიტიკულ მდგომარეობასთან. ამის შესახებ „სპუტნიკი“ აფხაზეთის ე.წ. პრემიერმინისტრ ვალერი ბგანბაზე დაყრდნობით იუწყება.
მისი ინფორმაციით, რუსეთიდან ელექტროენერგიის მიღება 27 თებერვლის 09:00 საათიდან დაიწყება. რუსული ელექტროენერგიით უზრუნველყოფილი იქნებიან გუდაუთა, გაგრა და სოხუმის ნაწილი. ოკუპირებული აფხაზეთის დანარჩენი ნაწილი კვლავინდებურად ენგურჰესიდან მომარაგდება, რაც ბგანბას განცხადებით, ხელს შეუწყობს ენგურჰესზე წყლის დონის მატებას და ელექტროენერგიის ხარისხი გაუმჯობესდება.