“ევროპული საქართველო“ პარლამენტს უკრაინის მართლმადიდებელი ეკლესიის მიერ ავტოკეფალიის მოპოვების შესახებ სპეციალური დადგენილების მიღებას სთავაზობს.

ოპოზიციონერმა დეპუტატმა ელენე ხოშტარიამ პარლამენტს განსახილველად დადგენილების პროექტი წარუდგინა, რომლის მიხედვით, საქართველოს პარლამენტი “მიესალმება უკრაინის მართლმადიდებელი ეკლესიის ავტოკეფალიის დაფუძნებას და მიიჩნევს რა, რომ ეს ისტორიული მოვლენა წარმოადგენს რწმენისა და აღმსარებლობის თავისუფლების გამარჯვებასა და ქვეყნის სუვერენიტეტის განმტკიცებისკენ გადაგმულ დიდ ნაბიჯს, ულოცავს უკრაინელ ხალხს საუკუნოვანი ბრძოლის უმნიშვნელოვანეს მონაპოვარს“.

როგორც დადგენილების პროექტის განმარტებით ბარათშია ნათქვამი, პროექტის მიზანია, საქართველოს პარლამენტის მიერ უკრაინის სახელმწიფოს მხარდაჭერა ეკლესიის მიერ ავტოკეფალიის მოპოვების პროცესში, რაც ნიშნავს უკრაინის სუვერენიტეტის განმტკიცებასა და რუსეთის ეკლესიისგან, როგორც რუსეთის აგრესიისა და იმპერიალისტური პოლიტიკის ინსტრუმენტისაგან გათავისუფლებას.