ფრაქცია „ევროპული საქართველო“ პარლამენტს მოუწოდებს, „თიბისი ბანკისა“ და ანაკლიის განვითარების კონსორციუმთან დაკავშირებულ პირებზე შესაძლო ზეწოლის შემსწავლელი დროებითი საგამოძიებო კომისია შეიქმნას.

როგორც სერგი კაპანაძემ ბიუროს დღევანდელ სხდომაზე განაცხადა, პროკურატურა აღნიშნულ საქმეში მხარეა და არ ღირს გამოძიების დასრულებამდე ლოდინი.

„მიმაჩნია, რომ ეს არის ძალიან მნიშვნელოვანი თემა, გამომდინარე მაღალი საზოგადოებრივი ინტერესიდან, ასევე გამომდინარე იქიდან, რომ „თიბისი ბანკის“ და მისი დამფუძნებლების ირგვლივ, ისევე როგორც ანაკლიის კონსორციუმის ირგვლივ განვითარებულმა მოვლენებმა ბევრ მანკიერებაზე მიუთითა რაც დღეს არსებობს საქართველოში. მათ შორის პირველ რიგში ხელისუფლების მხრიდან ზეწოლაზე. იქიდან გამომდინარე, რომ პროკურატურა, რომელიც იძიებს ამ საქმეს და რომელიც აშკარად ჩანს, რომ ამ საქმეში მხარეა და რომელიც ინსტრუმენტად იქნა გამოყენებული ხელისუფლების მიერ, ამას ბოლომდე ვერ გამოიძიებს.

ამიტომ ყველა ის კონტრარგუმენტი, რომ დაველოდოთ გამოძიებას და პროკურატურის დასკვნებს, მიუღებელია. აქედან გამომდინარე, მნიშვნელოვანი იქნება, რომ პარლამენტმა რომელსაც გააჩნია საჯაროობის და გამჭვირვალობის მაღალი ხარისხი, შექმნას დროებითი საგამოძიებო კომისია, რათა ამ საკითხს ერთხელ და სამუდამოდ მოფინოს ნათელი და გაირკვას რა ხდება.

მოვუწოდებ დეპუტატებს, რომ ამ საკითხს დაუჭირონ მხარი და საკითხი უახლოეს პერიოდში იქნას დღის წესრიგში შეტანილი“, - განაცხადა სერგი კაპანაძემ.

პარლამენტის თავმჯდომარემ სერგი კაპანაძეს რეპლიკის სახით უპასუხა და აღნიშნა, რომ „პროკურატურისთვის რომ გვეცლია უკეთესი იქნებოდა“.