თემატური მოკვლევის ჯგუფმა - „სახელმწიფო ეკონომიკურ პროგრამებში ქალთა მონაწილეობა“ - პირველი შეხვედრა გამართა

საქართველოს პარლამენტის გენდერული თანასწორობის საბჭომ 2018-2020 წლების სტრატეგიისა და სამოქმედო გეგმით განსაზღვრული ამოცანების შესაბამისად, საქართველოს პარლამენტის რეგლამენტის 155-ე მუხლის საფუძველზე, დაიწყო თემატური მოკვლევა სახელმწიფო ეკონომიკურ პროგრამებში ქალთა მონაწილეობის შესახებ. ამის შესახებ „ინტერპრესნიუსს“ პარლამენტიდან აცნობეს.

მათი ცნობით, საქართველო პარლამენტის გენდერული თანასწორობის საბჭოს ფარგლებში შექმნილმა თემატური მოკვლევის ჯგუფმა დღეს პირველი შეხვედრა გამართა. გენდერული თანასწორობის საბჭოს წევრის და თემატური მოკვლევის ჯგუფის მომხსენებლის, ნინო წილოსანის განცხადებით, საპარლამენტო კონტროლისა და ზედამხედველობის ახალი ინსტრუმენტი - თემატური მოკვლევა, განსაკუთრებულად ითვალისწინებს არასამთავრობო და სამოქალაქო სექტორის, ასევე ყველა დაინტერესებული მხარის აქტიურ ჩართულობას მოკვლევის პროცესში.

„თემა, რომელიც ჩვენ გენდერული თანასწორობის საბჭოში ავირჩიეთ და რომელსაც ვხელმძღვანელობ, შეეხება სახელმწიფო ეკონომიკურ პროგრამებში ქალთა მონაწილეობას. დღევანდელი შეხვედრის მიზანია, მაქსიმალურად მეტი ინფორმაცია მოგაწოდოთ ამ თემატური მოკვლევის შესახებ და მაქსიმალურად უზრუნველვყოთ თქვენი ჩართულობა. მოკვლევის სამიზნედ ავიღეთ ორი სამინისტროს პროგრამების გაანალიზება. ეს არის ეკონომიკისა და მდგრადი განვითარების სამინისტროს და გარემოს დაცვისა და სოფლის მეურნეობის სამინისტროების პროგრამები. მხოლოდ ორი სამინისტროს პროგრამები ავირჩიეთ იმის გამო, რომ შედეგი იყოს ხელშესახები“, - განაცხადა თემატური მოკვლევის ჯგუფის მომხსენებელმა.

ნინო წილოსანმა შეხვედრის მონაწილეებს გააცნო მოკვლევის ჯგუფის შემადგენლობა და ასევე, დეტალურად მიმოიხილა პროცესი.

თემატური მოკვლევის ჯგუფში შედიან საქართველოს პარლამენტის გენდერული თანასწორობის საბჭოს წევრები: დიმიტრი ცქიტიშვილი, ირინე ფრუიძე, ნინო გოგუაძე და გიორგი ტუღუში.

შეხვედრის ფარგლებში, გენდერული თანასწორობის საბჭოსა და აღნიშნული თემატური ჯგუფის წევრმა, ნინო გოგუაძემ აღნიშნა, რომ მთავარი, რასაც მოკვლევის ჯგუფი ეყრდნობა, არის სამოქალაქო საზოგადოებისგან მიღებული, დასაბუთებული და დოკუმენტურად დადასტურებული ინფორმაცია.

„თემატური მოკვლევის - ამ ინსტრუმენტის მთავარი იდეა არის ის, რომ სამოქალაქო საზოგადოება, თავისი ჩართულობით, დაეხმაროს პარლამენტს აღმასრულებელ ხელისუფლებაზე კონტროლის განხორციელებაში. ამიტომ, იმ ინფორმაციას, რასაც თქვენ მოგვცემთ არის ყველაზე მთავარი, ყველაზე ღირებული და ჩვენ მას გამოვიყენებთ ამ მოკვლევის პროცესში. რა თქმა უნდა, ეს ინფორმაცია უნდა იყოს დადასტურებული, დასაბუთებული, უნდა ემყარებოდეს კონკრეტულ არგუმენტებს და კონკრეტულ ფაქტებს“, - განაცხადა ნინო გოგუაძემ.

შეხვედრის მონაწილეებს სიტყვით მიმართეს და „სახელმწიფო ეკონომიკურ პროგრამებში ქალთა მონაწილეობის“ შესახებ თემატური მოკვლევის მნიშვნელობაზე და მიზნებზე ისაუბრეს - ეროვნულ-დემოკრატიული ინსტიტუტის (NDI) საპარლამენტო პროგრამის უფროსმა მენეჯერმა, თეონა ყუფუნიამ და თემატური მოკვლევის ჯგუფის ექსპერტმა, ანა დიაკონიძემ. ამასთან ერთად, ღონისძიებაზე საპარლამენტო თემატური მოკვლევის განხორციელების პროცესის შესახებ ვიდეო-რგოლის ჩვენება გაიმართა, რის შემდეგაც ჯგუფის წევრებმა შეხვედრის მონაწილეების შეკითხვებს უპასუხეს.

თემატური მოკვლევა სახელმწიფო ეკონომიკურ პროგრამებში ქალთა მონაწილეობის შესახებ ხორციელდება ეროვნულ-დემოკრატიული ინსტიტუტის (NDI) მხარდაჭერით და დიდი ბრიტანეთის მთავრობის UK aid-ის ფინანსური ხელშეწყობით.

ვიქტორ ყიფიანი - გარე პროცესების გავლენათა მართვა ყველა ჩვენგანის თანამონაწილეობას და საზიარო პასუხისმგებლობას მოითხოვს
ქართული პრესის მიმოხილვა 25.09.2020
კახა კუკავა - 7 პრიორიტეტი გვაქვს, რაც ჩვენ საარჩევნო პროგრამაშია
ემილ ავდალიანი - ირანი და ჩინეთი 400 მილიარდი დოლარის შეთანხმებას ამზადებენ, თუ ეს მოხდა პერსპექტივაში ჩინური გავლენა ირანსა და ახლო აღმოსავლეთზე ხელშესახები გახდება
„თელიანი ველის“ გლეხური რქაწითელი ქვევრი დეკანტერის უმაღლესი ჯილდოს მფლობელია
წინანდლის კლასიკური მუსიკის რიგით მეორე ფესტივალი დასრულდა
მე-3 და მე-4 კატეგორიების საწარმოებისთვის
Samsung Galaxy S20 FE (Fan Edition) წინასწარი შეკვეთები უკვე დაიწყო