სამოქალაქო აქტივისტების ნაწილმა ღამე ხურვალეთთან გაათენა

მოლოდინში გავათენეთ აქ ღამე. ხურვალეთში დილით, 08:00 საათზე უნდა შევსულიყავით, მაგრამ დრო 12:00 საათამდე გადაგვიწიეს. იმ შემთხვევაში, თუ 12:00 საათზეც რაღაც მიზეზს გვეტყვიან, უკვე მოსახლეობას მოვუწოდებთ, ჩამოვიდნენ და მერე ერთად შევიდეთ ყველანი, - ამის შესახებ "ინტერპრესნიუსს" ანტისაოკუპაციო მოძრაობის "ძალა ერთობაშიას" აქტივისტმა, დავით ქაცარავამ განუცხადა.

როგორც ის განმარტავს, წუხელ, გვიან ღამით, მას ძალოვანი სტრუქტურების წარმომადგენლებთან ჰქონდა კომუნიკაცია და სწორედ, მათი დაჟინებული მოთხოვნით მოხდა ხურვალეთში შესვლის დროის რამდენიმე საათით გადაწევა.

"გუშინ გვიან ღამით კიდევ ერთი კომუნიკაცია შედგა ჩვენსა და ძალოვანი სტრუქტურის წარმომადგენლებს შორის. მათგან დაჟინებული მოთხოვნა იყო, შესვლის დრო გადაწეულიყო. ჩემთვის ცოტა გაუგებარი იყო, თუმცა, ბუნებრივია, ამას დავთანმხდით, ვინაიდან ჩვენი მიზანი არანაირი პროვოკაცია არ არის, თუმცა, ამის ჩვენთვის მოწებების არაერთი მცდელობა იყო. გუშინ ხელისუფლების წარმომადგენლებს მოუწიათ აღიარება, რომ რუსები საქართველოს ხელისუფლების მიერ კონტროლირებად ტერიტორიაზე იყვნენ შემოსულები. რამდენიმე საათის შემდეგ, როცა მოლაპარაკებები გაიმართა და ზეწოლა მოხდა რუსულ მხარეზე, ოკუპანტებს მოუწიათ გასვლა. გადავწყვიტეთ, რომ ეს სიტუაცია ჩვენი თვალით გვენახა, ეს იყო ჩვენი ძირითადი მოთხოვნა", - განაცხადა ქაცარავამ.

როგორც ის განმარტავს, აქტივისტებმა საკუთარი თვალით უნდა ნახონ, რომ რუსმა ოკუპანტებმა საქართველოს ხელისუფლების მიერ კონტროლირებადი ტერიტორია დატოვეს.

"გუშინ ძალიან აქტიურად ცდილობდა ტროლების ქარხანა, რომ საზოგადოება დაერწმუნებინა იმაში, რომ დეზინფორმაცია გავრცელდა და ქალბატონმა ლუდა სალიამ მოიტყუა. საბოლოო ჯამში, ხელისუფლებამ რუსების შემოსვლის ფაქტი დაადასტურეს, შემდეგ გასვლის, მაგრამ გასვლაში ჩვენც გვინდა დავრწმუნდეთ, ჩვენ არ გვაქვს უფლება, ერთი გოჯი მიწაც კი გავატანოთ ოკუპანტებს.

ჩვენ უნდა ვნახოთ ზუსტად ის ბაღები, სადაც შემოსული იყვნენ რუსი ოკუპანტები. ეს გახლავთ ხუროშვილის და ბატონისაშვილის საკუთრებაში არსებული ბაღის ნაკვეთები", -აღნიშნა ქაცარავამ.

ამ წუთებში ხურვლეთთან, ქართული პოლიციის საგუშაგოსთან ის ადამიანები იკრიბებიან, რომლებიც ოკუპაციას აპროტესტებენ.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს