საქართველოს თავდაცვის სამინისტროს „არმიჰოლში“ „ნატო-საქართველოს სწავლება 2019“ 18 მარტს ოფიციალურად გაიხსნება.

სწავლებას საქართველოს თავდაცვის მინისტრის პირველი მოადგილე ლელა ჩიქოვანი და ნატო-ს გაერთიანებული ძალების წვრთნის ცენტრის მეთაურის მოადგილე, ბრიგადის გენერალი ლადისლავ იუნგი გახსნიან.

„ნატო-საქართველოს სწავლება 2019“ სამეთაურო-საშტაბო სწავლებაა, რომელიც 18-29 მარტის ჩათვლით “წვრთნისა და შეფასების ერთობლივ ცენტრში” გაიმართება და მასში 343 სამხედრო და სამოქალაქო პირი მიიღებს მონაწილეობას. ასევე, „ნატო-საქართველოს სწავლება 2019“ პირველი ერთობლივი მრავალეროვნული ბრიგადის დონის სამეთაურო-საშტაბო სწავლებაა, რომელსაც საქართველოს თავდაცვის ძალები ხელმძღვანელობს.

თავდაცვის სამინისტროს ცნობით, სწავლება მიზნად ისახავს საქართველოს, ალიანსის და პარტნიორი ქვეყნების შეიარაღებული ძალების ურთიერთთავსებადობის ამაღლებასა და საქართველოს თავდაცვის ძალების მართვისა და კონტროლის შესაძლებლობების გაძლიერებას. სწავლება, ასევე, გამოცდის ალიანსის Non Article 5 კრიზისებზე რეაგირების ყოვლისმომცველ მიდგომას. პროცესში აქტიურად იქნებიან ჩართულნი საერთაშორისო და არასამთავრობო ორგანიზაციების წარმომადგენლები, რაც ხელს შეუწყობს სამხედრო-სამოქალაქო თანამშრომლობის გაღრმავებას.

„ნატო-საქართველოს სწავლება 2019“ რიგით მეორე სწავლებაა, რომელიც ნატო-საქართველოს არსებითი პაკეტის ფარგლებში (SNGP) ჩატარდება - პაკეტი საქართველოს 2014 წელს უელსში გამართულ ნატო-ს სამიტზე მიენიჭა.

ქართულ მხარეს სწავლების დაგეგმვისა და აღსრულების პროცესში მენტორობას ნატო-ს ტრანსფორმაციის სარდლობა, ნატო-ს სახმელეთო ჯარების სარდლობა და გაერთიანებული ძალების წვრთნის ცენტრი გაუწევს.

ამასთან, წინა სწავლებისგან განსხვავებით, ღონისძიება გაფართოვდა და წლევანდელ წვრთნებში 24 ქვეყანა მიიღებს მონაწილეობას.

სწავლებაში, ასევე, აქტიურად იქნებიან ჩართულები საერთაშორისო ჰუმანიტარული ორგანიზაციები - “წითელი ჯვრის საერთაშორისო კომიტეტი”, გაეროს სამშვიდობო ოპერაციების დეპარტამენტი და გაერო-ს მსოფლიო ჯანდაცვის ორგანიზაცია.