გორში 9 წლის გოგონას ნანიკო ბერიაშვილის მკვლელობის საქმეზე დღეს თბილისის საქალაქო სასამართლოში მოკლულის დედა ნათია ლალიაშვილი დაიკითხება.

აღნიშნული ინფორმაცია "ინტერპრესნიუსს" ნანიკო ბერიაშვილის ბაბუამ, ხვიჩა ბერიაშვილმა მიაწოდა.

თბილისის საქალაქო სასამართლოში, ამ წუთებში, ბერიაშვილის მკვლელობის საქმეზე დაკავებული იაგო ნებიერიძის ბრალდების სისხლის სამართლის საქმეზე პროცესი მიმდინარეობს.

შეგახსენებთ, რომ გორში 9 წლის ნანიკო ბერიაშვილი 25 ოქტომბერს გაუჩინარდა. ის რამდენიმე საათში სამართალდამცველებმა გარდაცვლილი იპოვეს. აღნიშნულთან დაკავშირებით, 33 წლის, წარსულში ნასამართლევი იაგო ნებიერიძე დააკავეს.

იაგო ნებიერიძეს ბრალი წარდგენილი აქვს სისხლის სამართლის კოდექსის 138-ე მუხლის მესამე ნაწილის "გ" ქვეპუნქტით, რაც გულისხმობს სექსუალური ხასიათის სხვაგვარი ქმედების ჩადენას.

ნებიერიძეს ასევე ბრალი წარდგენილი აქვს სსკ-ის 109-ე მუხლით, რაც დამამძიმებელ გარემოებაში განზრახ მკვლელობას გულისხმობს.