საფრანგეთის პრეზიდენტის, ემანუელ მაკრონის განცხადებით, დიდ ბრიტანეთში სახეზეა პოლიტიკური და დემოკრატიული კრიზისი.

„ბრიტანელი პოლიტიკოსები ვერ ახორციელებენ იმას, რასაც ხალხი ითხოვს მათგან. ხალხმა მხარი დაუჭირა Brexit-ს, ახლა კი სიტუაციაა, როდესაც ბრიტანული პარლამენტი ამბობს: „მხარს არ დავუჭერთ შეთანხმებას, რომელზეც მოლაპარაკებები ორი წლის განმავლობაში მიმდინარეობდა“. ეს პოლიტიკურ და დემოკრატიულ კრიზისზე მეტყველებს“, - განაცხადა საფრანგეთის პრეზიდენტმა.

ემანუელ მაკრონმა ხაზგასმით აღნიშნა, რომ „ბრიტანელებმა უნდა აღმოფხვრან ყველა ის გაუგებრობა, რომელიც თვითონ შექმნეს“.

„ევროკავშირის წევრი ქვეყნები შესაძლო ხისტი Brexit-სთვის მოემზადნენ. თუ ბრიტანეთის პარლამენტი მხარს არ დაუჭერს ბრიუსელსა და ლონდონს შორის დადებულ შეთანხმებას, მაშინ 12 აპრილამდე საკუთარი წინადადებები უნდა წარმოგვიდგინონ“, - აღნიშნა მან.