ევროკავშირი ამერიკის პრეზიდენტის მოწოდების საპასუხოდ, რომ გოლანის მაღლობები ისრაელის ნაწილად აღიაროს, აცხადებს, რომ ევროპის ქვეყნები არ აღიარებენ ისრაელის სუვერენიტეტს აღნიშნულ ტერიტორიებზე და მათ ოკუპირებულად მიიჩნევენ. ამის შესახებ „დოიჩე ველე“ იუწყება.

„ევროკავშირის პოზიცია არ შეცვლილა. ევროკავშირი საერთაშორისო სამართლის ნორმების შესაბამისად, არ აღიარებს ისრაელის სუვერენიტეტს იმ ტერიტორიებზე, რომლებიც ისრაელის მიერ 1967 წლიდან არის ოკუპირებული, მათ შორის, გოლანის მაღლობები და არ მიიჩნევს მათ ისრაელის ტერიტორიებად“ - განუცხადა „როიტერს“ ევროკავშირის წარმომადგენელმა.

როგორც ცნობილია, ამერიკის პრეზიდენტმა დონალდ ტრამპმა „ტვიტერის“ პირად გვერდზე გუშინ დაწერა, რომ შეერთებულმა შტატებმა უნდა აღიაროს ისრაელის სრული სუვერენიტეტი გოლანის მაღლობებზე.