ღაზას სექტორიდან ისრაელის მიმართულებით სარაკეტო დარტყმის გამო, ისრაელის პრემიერ-მინისტრი აშშ-ში ვიზიტს ვადაზე ადრე შეწყვეტს.

„ვესაუბრე გენშტაბის ხელმძღვანელს. ისრაელის სახელმწიფოს წინააღმდეგ დანაშაულებრივი თავდასხმა განხორციელდა. ჩვენ ამას ძალის გამოყენებით ვუპასუხებთ. გადაწყვეტილება მივიღე შევამცირო ჩემი ვიზიტის დღეები აშშ-ში. რამდენიმე საათში აშშ-ს პრეზიდენტს შევხვდები, რის შემდეგაც დაუყოვნებლივ ისრაელში დავბრუნდები, რათა ჩვენს საპასუხო ზომებს ვუხელმძღვანელო“, - განაცხადა ბენიამინ ნეთანიაჰუმ.

შეგახსენებთ, რომ ღაზას სექტორიდან გაშვებული რაკეტის გამო ისრაელის შვიდი მოქალაქე დაშავდა.

ბენიამინ ნეთანიაჰუს ვიზიტი აშშ-ში დღეს დაიწყო. გარდა აშშ-ს პრეზიდენტთან შეხვედრისა მას დაგეგმილი ჰქონდა შეხვედრები ამერიკული პოლიტიკური ისტებლიშმენტის წარმომადგენლებთან.