კობა გვენეტაძე პარლამენტში კიდევ ერთხელ მივა
საქართველოს ეროვნული ბანკის პრეზიდენტი აპრილის თვეში პარლამენტში დეპუტატების წინაშე წარსდგება, რაზეც მან პარლამენტს წერილობით უკვე მიმართა,- ამის შესახებ „ინტერპრესნიუსს“ „საქართველოს ეროვნულ ბანკში“ განუცხადეს.
„ინტერპრესნიუსი“ დაინტერესდა, მივა თუ არა პარლამენტში „ევროპული საქართველოს" მიერ საბანკო რეგულაციების თემასთან დაკავშრებით მიწვევის საპასუხოდ ეროვნული ბანკის პრეზიდენტი კობა გვენეტაძე. როგორც ეროვნულ ბანკში განმარტავენ, კობა გვენეტაძე პარლამენტში ორ თემაზე სასაუბროდ მივა.
„ეროვნულმა ბანკმა ერთდროულად ორი საპარლამენტო კომიტეტისგან მიიღო მოწვევა, რომ მივიდეს პარლამენტში. ამიტომ კობა გვენეტაძემ კანონმდებლებს ორი საკითხის პლენარულ სხდომაზე განხილვა შესთავაზა. ეს საკითხებია „თიბისი ბანკის“ მიმართ საქართველოს ეროვნული ბანკის მიერ მიღებული გადაწყვეტილებები და პასუხისმგებლიანი დაკრედიტების რეგულაციები,“ - განმარტავენ ეროვნულ ბანკში.
შეგახსენებთ, რომ ეროვნულმა ბანკმა, 26 თებერვლის საკომიტეტო მოსმენაზე პირველადი შედეგების შეფასებისთვის რეგულაციების ამოქმედებიდან მინიმუმ სამი თვის ვადის გასვლა ითხოვა.
