საქართველოს პრეზიდენტი სალომე ზურაბიშვილი დღეს აჭარის ავტონომიურ რესპუბლიკას ეწვევა და თეატრის საერთაშორისო დღესთან დაკავშირებულ ღონისძიებებში მიიღებს მონაწილეობას.
როგორც „ინტერპრესნიუსს“ პრეზიდენტის ადმინისტრაციიდან აცნობეს, თეატრის საერთაშორისო დღე, ბათუმში, ილია ჭავჭავაძის სახელობის სახელმწიფო პროფესიული დრამატული თეატრის ძირითადი შენობის გახსნით აღინიშნება.
მათივე ინფორმაციით, სალომე ზურაბიშვილი, საქართველოს პრემიერ-მინისტრთან და ადგილობრივი ხელისუფლების წარმომადგენლებთან ერთად, თეატრში დავით კლდიაშვილის ნაწარმოებების მიხედვით დადგმული სპექტაკლის პრემიერას დაესწრება.