საგარეო ურთიერთობათა კომიტეტის თავმჯდომარე, სოფიო ქაცარავა კანტის აკადემიის მოსწავლეებს შეხვდა. როგორც „ინტერპრესნიუსს“ საქართველოს პარლამენტიდან აცნობეს, სოფიო ქაცარავამ სტუმრებს საქართველოს საგარეო პოლიტიკის ძირითადი პრიორიტეტები გააცნო და მისი განხორციელების პროცესებზე ესაუბრა.
ამასთან, სოფიო ქაცარავამ ევროპულ და ევროატლანტიკურ სტრუქტურებში საქართველოს ინტეგრაციის გზაზე ქვეყანაში მიმდინარე დემოკრატიულ რეფორმებს გაუსვა ხაზი და ამ პროცესში საზოგადოების ჩართულობის მნიშვნელობაზე ისაუბრა.
საქართველოს პარლამენტის ინფორმაციით, შეხვედრისას, დისკუსია გაიმართა ისეთ მნიშვნელოვან საკითხებსა და გამოწვევებზე, როგორიც არის საქართველოს სუვერენიტეტი და ტერიტორიული მთლიანობა, ოკუპირებული ტერიტორიები და იქ მიმდინარე პროცესები. საუბარი შეეხო ასევე, ეკონომიკური მდგრადობის, უსაფრთხოებისა და დემოკრატიული ინსტიტუტების გაძლიერების საკითხებს. განსაკუთრებული ყურადღება გამახვილდა განათლების მნიშვნელობაზე.
„ჩემი საქმიანობის ერთ-ერთ მნიშვნელოვან ასპექტს ახალგაზრდებთან შეხვედრა, მათი აზრის მოსმენა და გაზიარება წარმოადგენს. მოხარული ვარ, რომ ახალგაზრდების მხრიდან მუდმივად არის დაინტერესება ქვეყნის საგარეო პრიორიტეტებთან დაკავშირებით“, - განაცხადა სოფიო ქაცარავამ.