საქართველოს პარლამენტის თავმჯდომარე, რომელიც ვიზიტით სერბეთის რესპუბლიკაში იმყოფება, სერბეთის პატრიარქ ირინეოსს შეხვდა. როგორც „ინტერპრესნიუსს“ საქართველოს პარლამენტიდან აცნობეს, შეხვედრაზე ორ ქვეყანას შორის არსებულ ურთიერთობაზე ისაუბრეს და ორმხრივი ურთიერთობის გაღრმავებაში საქართველოსა და სერბეთის საპატრიარქოების განსაკუთრებულ წვლილს გაუსვეს ხაზი.

სერბეთის პატრიარქმა საქართველოს სუვერენიტეტისა და ტერიტორიული მთლიანობის მიმართ მტკიცე მხარდაჭერა გამოხატა. ირაკლი კობახიძემ პატრიარქ ირინეოსს საქართველოს კათოლიკოს-პატრიარქის, ილია მეორეს მიერ გაგზავნილი საჩუქარი - ხარების ხატი გადასცა. საქართველოს პარლამენტის თავმჯდომარემ პატრიარქს ჩვენი ქვეყნის მხარდაჭერისთვის მადლობა გადაუხადა.

თავის მხრივ, სერბეთის პატრიარქმა საპარლამენტო დელეგაცია დალოცა და კიდევ ერთხელ აღნიშნა ორ ქვეყანას შორის კავშირების შემდგომი გაღრმავების მნიშვნელობა.