ის, რომ რუსეთის ფედერაცია აგრძელებს ჩვენი ქვეყნის 20%-ის ოკუპაციას, არ უნდა იყოს გამოყენებული იმისთვის, რომ საქართველოს ნატო-ში ინტეგრაციის გზაზე ეს იყოს ბარიერი, - ამის შესახებ პრემიერ-მინისტრმა მამუკა ბახტაძემ მთავრობის სხდომის დაწყებამდე გამართულ ბრიფინგზე განაცხადა.

მთავრობის მეთაურის განცხადებით, არცერთ ქვეყანას არ აქვს იმის უფლება, რომ რომელიმე ერს სუვერენული არჩევანი შეუზღუდოს.

„ნატო-ში ინტეგრაცია ჩვენი საგარეო პოლიტიკის უმნიშვნელოვანესი პრიორიტეტია და ის ფაქტი, რომ მოსახლეობის ძალიან დიდი ნაწილი მხარს უჭერს ამ იდეას, ნიშნავს იმას, რომ ეს არ არის მხოლოდ პოლიტიკური გადაწყვეტილება, ის ეფუძნება ღირებულებებს. ჩვენ ვაშინგტონში მოვისმინეთ ძალიან ძლიერი გზავნილები იმასთან დაკავშირებით, რომ არცერთ ქვეყანას არ აქვს უფლება სუვერენული არჩევანი შეუზღუდოს რომელიმე ერს, თავისუფალ ქვეყანას და ამ შემთხვევაში საქართველოს. ის ბერკეტი, რომ რუსეთის ფედერაცია აგრძელებს ჩვენი ქვეყნის 20%- ის ოკუპაციას, არ უნდა იყოს გამოყენებული იმისთვის, რომ საქართველოს ნატო-ში ინტეგრაციის გზაზე ეს იყოს ბარიერი. ჩვენ ამის შესახებ მოვისმინეთ გზავნილები ნატო-ს გენერალური მდივნისგან და ასევე, მოვისმინეთ ვაშინგტონში,“ - განაცხადა მამუკა ბახტაძემ.