ევროკავშირის საბჭოს პრეზიდენტი დონალდ ტუსკი დიდ ბრიტანეთს Brexit-ის ერთი წლით, 2020 წლის 31 მარტამდე გადავადების წინადადებით მიმართავს. ამის შესახებ ინფორმაციას ბრიტანული ტელეარხი Sky News ავრცელებს.
Sky News-ის ექსკლუზიური ინფორმაციით, დონალდ ტუსკმა ევროკავშირის ოფიციალურ პირებთან საუბრისას განაცხადა, რომ იმ სიტუაციაში, როდესაც ბრიტანეთის პარლამენტი ლონდონსა და ბრიუსელს შორის მიღწეულ შეთანხმებას არ ამტკიცებს, გონივრული გამოსავალი იქნება დიდი ბრიტანეთის ევროკავშირიდან გასვლის ერთი წლით გადავადება.
მისივე თქმით, იმ შემთხვევაში თუ ბრიტანეთის პარლამენტი Brexit-ის შესახებ შეთანხმებას დაამტკიცებს, დიდი ბრიტანეთის ევროკავშირიდან გასვლა უფრო ადრეც შეიძლება მოხდეს.
შეგახსენებთ, რომ დღეს დიდი ბრიტანეთის პრემიერ-მინისტრმა ტერეზა მეიმ ევროკავშირის საბჭოს პრეზიდენტს წერილით მიმართა და თხოვა, დიდი ბრიტანეთის ევროკავშირიდან გასვლის თარიღმა 30 ივნისამდე გადაიწიოს.