სოფელ შამგონას მკვიდრი, რომელიც ე.წ. საზღვრის გადაკვეთის ბრალდებით დააკავეს, გალის წინასწარი დაკავების იზოლატორიდან გაათავისუფლეს
ე.წ. საზღვრის კვეთისთვის დაკავებული სოფელ შამგონას მკვიდრი, 38 წლის გელა როსტობაია გალის წინასწარი დაკავების იზოლატორიდან გაათავისუფლეს.
აღნიშნული ინფორმაცია „ინტერპრესნიუსს“ სახელმწიფო უსაფრთხოების სამსახურში დაუდასტურეს.
გელა როსტობაია 5 აპრილს დააკავეს. მისი ოჯახის წევრები დაკავებულის მიერ ე.წ. საზღვრის გადაკვეთის ვერსიას გამორიცხავდნენ. როსტობაიას მამა შვილის დაკავების შემდეგ აცხადებდა, რომ ისინი მდინარესთან ახლოს ცხოვრობენ და სათევზაოდ არაერთხელ წასულან, თუმცა გაღმა ნაპირზე არასოდეს გადასულან.
