„ბოლო 30 წლის განმავლობაში ბევრი შეცდომა დავუშვით, მათ შორის იყო რუსების მიერ ჩვენი დაყოფისკენ მიმართულ პროვოკაციებზე წამოგება“, - ამის შესახებ ექსპერტმა რამაზ საყვარელიძემ „ინტერპრესნიუსს“ განუცხადა.

ექსპერტი შეეხო 9 აპრილს, ასევე, ისაუბრა საქართველოს მიერ ბოლო 30 წლის განმავლობაში განვლილ გზაზე და აღნიშნა, რომ ამ წლებში იყო როგორც წინსვლა, ისე - შეცდომები, რაც განვითარებას თან ახლავს.

„9 აპრილს საქართველოს დამოუკიდებლობის იდეა გახდა ცხადი და ამაშია მისი უდიდესი როლი. ბოლო 30 წლის განმავლობაში ბევრს მივაღწიეთ და ბევრი შეცდომაც დავუშვით. ეს ბუნებრივია, რადგან განვითარება სწორი ხაზით არასდროს მიდის. შეცდომა შიდა დაპირისპირებებიც იყო იმ მომენტისთვის, როცა მართლა კონსოლიდაცია გვინდოდა. რუსების ხრიკებმა, ხერხებმა, რაც ჩვენი დაყოფისა და დანაწევრებისკენ იყო მიმართული, გაჭრა. შეცდომები პროვოკაციების შედეგი იყო, მაგრამ პროვოკაციებზე წამოგებაც უკვე შეცდომაა. დღესდღეობით კი, დემოკრატიულ პოლიტიკას ყოველთვის ახლავს პოლიტიკური დაპირისპირება და ეს ბუნებრივია. თუმცა სხვა მხრივ, ფიზიკური დაპირისპირებისკენ ნაბიჯის გადადგმის საფრთხე აღარ გვემუქრება“, - განუცხადა „ინტერპრესნიუსს“ საყვარელიძემ.