ჩემი გასარჩევი არ არის, პოლიციამ რა ზომა უნდა გაატაროს კონკრეტულ შემთხვევაში, - ამის შესახებ პარლამენტის პირველმა ვიცე-სპიკერმა თამარ ჩუგოშვილმა ზუგდიდში „ნაციონალური მოძრაობის" წევრების დაკავებასთან დაკავშირებით განაცხადა.

ამასთან, თამარ ჩუგოშვილი იმედოვნებს, რომ აღნიშნულ თემაზე პოლიტიკური სპეკულაციები აღარ იქნება.

„არსებობს იმ კონკრეტული მომენტის კადრები, როდესაც პოლიციამ მიიღო დაკავების გადაწყვეტილება და მგონი, კადრებიდან შეიძლება ამოკითხვა. ჩემი გასარჩევი არ არის პოლიციამ რა ზომა უნდა გაატაროს კონკრეტულ შემთხვევაში. მთავარია ახლა გარეთ არიან ეს ადამიანები და მე მგონი ზედმეტი სპეკულაციები ამ თემების გარშემო აღარ შეგვხვდება",-განაცხადა თამარ ჩუგოშვილმა.

შეგახსენებთ, რომ გუშინ, გვიან ღამით ზუგდიდში სამართალდამცველებმა „ნაციონალური მოძრაობის“ სამი წევრი დააკავეს. დაკავებულთაგან ორი მათგანი გუშინვე გაათავისუფლეს, ხოლო ერთ-ერთ მათგანს ბრალი ადმინისტრაციულ სამართალწარმოებათა კოდექსის 161-ე და 173-ე მუხლებით წარედგინა.