პარლამენტის თავმჯდომარე ირაკლი კობახიძე 13 აპრილს, ფილარმონიაში, მოძრაობა “დაიცავი საქართველოს“ მიერ დაგეგმილ შეხვედრას მოახლოებულ საპარლამენტო არჩევნებს უკავშირებს.
როგორც კობახიძემ “პალიტრანიუსის“ გადაცემა “360 გრადუსში“ განაცხადა, ის გარემოება, რომ მომდევნო არჩევნები 3%-იანი ბარიერის პირობებში ჩატარდება, ახალი პარტიების შექმნის დამატებით მოტივაციას ქმნის.
“მოახლოებულია საპარლამენტო არჩევნები. თან შემდგომი არჩევნები ერთჯერადად, 3%-იანი ბარიერით ჩატარდება. აქედან გამომდინარე, დიდია ცდუნება, რომ კონკრეტულმა ადამიანებმა შექმნან პოლიტიკური პარტიები და შემდეგ არჩევნებში მიიღონ მონაწილეობა. 3%-იანი საარჩევნო ბარიერი ამის დამატებით მოტივაციას ქმნის. გამომდინარე აქედან, ბუნებრივია ამ წელიწადნახევრის განმავლობაში შეიქმნება პარტიები. ეს არის პროცესი, რაც დამახასიათებელია იმ დროისთვის, როდესაც არჩევნები ახლოვდება“, - განაცხადა ირაკლი კობახიძემ.
მისივე თქმით, პარტია “ქართულ ოცნებას“ აქვს მყარი საზოგადოებრივი მხარდაჭერა და მისი ამოცანაა არჩევნებში გამარჯვება.
“დარწმუნებული ვარ, ეს შედეგი აუცილებლად იქნება მიღწეული“, - დასძინა მან.