„ქართული ოცნების“ ყოფილი წევრის ეკა ბესელიას განცხადებით, თუკი “საერთო სასამართლოების შესახებ“ კანონში დაგეგმილი ცვლილებების პროექტში მისი მეორე მოსმენით განხილვისას პრინციპული და არსობრივი ხასიათის შესწორებები შევა, ამით დაირღვევა პროცედურა და კანონი.

როგორც ბესელიამ ჟურნალისტებთან საუბრისას აღნიშნა, უმრავლესობამ საკუთარი პროექტი ან უნდა ჩააგდოს ან უკან გაიწვიოს და მხარი 13 დეპუტატის მიერ ინიცირებულ კანონპროექტს დაუჭიროს, რადგან მასში ყველა ის საკითხია ასახული, რასაც ვენეციის კომისია პარლამენტს სთავაზობს.

ბესელიას შეფასებით, პროცესი ჩიხშია შესული და ეს ვითარება პარლამენტის თავმჯდომარემ ირაკლი კობახიძემ შექმნა.

“ეს ყველაფერი იმიტომ ხდება, რომ პარლამენტში ადამიანები უადგილო ადგილას მოხვდნენ“, - დასძინა ეკა ბესელიამ.