ის პიროვნებები, რომლებიც სამედიცინო დახმარებას აწვდიან პაციენტებს, უნდა იყვნენ დაცულები, - ამის შესახებ ჯანდაცვის მინისტრის მოადგილე ზაზა ბოხუამ განაცხადა.
ამით მინისტრის მოადგილე გამოეხმაურა საქართველოს პარლამენტის მიერ ინიცირებული საკანონმდებლო ცვლილებას, რომლის მიხედვითაც, სამედიცინო საქმიანობის დროს მედპერსონალის შეურაცხყოფა ან პროფესიული მოვალეობის შესრულებისთვის ხელის შეშლა დასჯადი ხდება.
„ადამიანის უფლებებიდან გამომდინარე, პაციენტს აქვს უფლება მას მიეწოდოს დროული, კვალიფიცირებული და ადეკვატური სამედიცინო დახმარება. ზუსტად აქედან გამომდინარე ხდება, რომ ის პიროვნებები, რომლებიც სამედიცინო დახმარებას აწვდიან პაციენტებს, უნდა იყვნენ დაცულები. სამედიცინო პერსონალისთვის ხელის შეშლა გამოიწვევს მესამე პირისთვის, პაციენტისთვის, ადეკვატური დახმარების მიწოდების ხელშეშლას,“ - განაცხადა ზაზა ბოხუამ.
ინიციატივის მიხედვით, სამედიცინო საქმიანობის დროს მედპერსონალის პროფესიული მოვალეობის შესრულებისათვის რაიმე ფორმით ხელის შეშლა, პატივისა და ღირსების შელახვა, ფიზიკური, ფსიქოლოგიური ზეწოლა, ძალადობა ან მუქარა დასჯადი გახდება. ამ დრომდე, ძალადობის შემთხვევაში, სასამართლოსა და ძალოვანი უწყების მიერ, საკითხი სისხლის სამართლის, ადმინისტრაციულ დარღვევათა და სხვა შესაბამისი კანონებით განიხილებოდა, ახალი ინიციატივის თანახმად კი, კანონში უშუალოდ სამედიცინო პერსონალზე ძალადობის შემთხვევებზე რეაგირების დამატებითი მუხლები გაჩნდება.