მინისტრი პოლიტიკური თანამდებობაა და წარმოუდგენელია საპარლამენტო რესპუბლიკაში, საკითხი შიდა გუნდში განხილვას მაინც არ ექვემდებარებოდეს - ეს კითხვა მექნებოდა პრემიერთან,-ამის შესახებ საპარლამენტო უმრავლესობის წევრმა ლევან კობერიძემ განაცხადა.

„შეფასებას გავაკეთებ თვითონ ამ ფაქტთან, ჟრიამულით ატეხილ გაუგებრობასთან დაკავშირებით -მოხსნეს თუ დანიშნეს. ეკონომიკის კომიტეტში ვარ და კომიტეტში არაფერი გვსმენია საერთოდ ვინმეს თუ ხსნიდნენ ან ნიშნავდნენ. ეს ჩვენი მინუსი თუ არის, არ ვიცი, მაგრამ მგონი ვცდილობთ კარგად ვიმუშაოთ. მინისტრი, პოლიტიკური თანამდებობაა და წარმოუდგენელია, რომ მოხსნა და დანიშვნაც საპარლამენტი რესპუბლიკში შიდა გუნდში განხილვას მაინც არ ექვემდებარებოდეს-ეს კითხვა მექნებოდა პრემიერ-მინისტრთან",-განაცხადა კობერიძემ.

მისივე თქმით, გიორგი ქობულიას მუშაობას უარყოფითად ვერ შეაფასებს, თუმცა მისი თქმით მინისტრს ეკონომიკის კომიტეტთან ნაკლები კომუნიკაცია ჰქონდა.

„რაც შეეხება იმას, რომ არასაკმარისი კომუნიკაცია გვქონდა ეკონომიკის კომიტეტს ყოფილ მინისტრთან- ეს შემიძლია დავადასტურო, თუმცა რა იყო მისი წასვლის მიზეზი, ეს ინფორმაცია მე არ მაქვს“, - აცხადებს კობერიძე.

დღეს გიორგი ქობულიამ ეკონომიკის მინისტრის თანამდებობა დატოვა. ამ პოსტზე ნათია თურნავა დაინიშნა.