ლიბიაში მყოფი ორი ქართველი მეზღვაური სამშობლოში უახლოეს მომავალში დაბრუნდება, - ამის შესახებ ჟურნალისტებს საქართველოს საგარეო საქმეთა სამინისტროს წარმომადგენელმა ვლადიმერ კონსტანტინიდიმ განუცხადა. მისი თქმით, ლიბიელმა სამართალდამცველებმა ქართველ მეზღვაურებს ის შეზღუდვები მოუხსნეს, რომელიც ქვეყნიდან გაუსვლელობის პირობას ითვალისწინებდა.

„გუშინ გამოძიებამ მიზანშეწონილად ჩათვალა, რომ ჩვენი მოქალაქეები გათავისუფლებულიყვნენ შეზღუდვისგან. ისინი საქართველოში გამოემგზავრებიან უახლოეს მომავალში. საგარეო საქმეთა სამინისტრომ, ჩვენმა საელჩოებმა ეგვიპტეში და თურქეთში ძალიან შრომატევადი სამუშაო გასწიეს ამ საქმის მონიტორინგზე, რომ ჩვენი მოქალაქეების სიცოცხლისა და ჯანმრთელობის პირობები ყოფილიყო უზრუნველყოფილი. განსაკუთრებულ ყურადღებას ვაქცევდით, რადგან ლიბიაში საკმაოდ მძიმე პოლიტიკური და ჰუმანიტარული ვითარებაა“, - განაცხადა ვლადიმერ კონსტანტინიდიმ.