სასამართლოში სანზონაში გარდაცვლილი 4 წლის ბავშვის მიმღები ოჯახის წევრები დაიკითხებიან
სანზონაში 4 წლის ნინო ზალინაშვილის გარდაცვალების ფაქტთან დაკავშირებით დაკავებული დედის, ლელა ქსოვრელის ბრალდების სისხლის სამართლის საქმეზე, დღევანდელ სასამართლო პროცესზე, გარდაცვლილი მცირეწლოვნის მიმღები ოჯახის წევრები დაიკითხებიან.
აღნიშნულის შესახებ ჟურნალისტებს საქმის პროკურორმა, ლევან ჟორჟოლაძემ სხდომის დაწყებამდე განუცხადა.
როგორც ჟორჟოლაძე აღნიშნავს, დღეს დასაკითხი პირები მნიშვნელოვან ინფორმაციას ფლობენ, ვინაიდან ნინო ზალინაშვილი მათთან დაბადებიდან ცხოვრობდა.
„დღევანდელ სხდომაზე მოწმის სახით დაიკითხებიან გარდაცვლილი არასრულწლოვნის მიმღები ოჯახის წევრები, რომლებთანაც ის დაბადებიდან წლების განმავლობაში ცხოვრობდა. ისინი სასამართლოს საქმის შესახებ მათთვის ცნობილი გარემოებებიდან გამომდინარე მიაწვდიან ინფორმაციას. კითხვებს დავუსვამთ არასრულწლოვნის ცხოვრების წესთან დაკავშირებითაც. ისინი როგორც ბრალდების მხარის, ასევე დაცვის მხარის შეკითხვებსაც გასცემენ პასუხს", - განაცხადა ჟორჟოლაძემ.
შეგახსენებთ, რომ ლელა ქსოვრელი შემაკავებელი ორდერის პირობების დარღვევისთვის დააკავეს, თუმცა, გამოძიების მიმდინარეობისას, მას პროკურატურამ ბრალი დაუმძიმა.
პროკურატურის ინფორმაციით, 4 წლის გოგონას ქსოვრელმა თავის არეში სიცოცხლისთვის სახიფათო მძიმე ხარისხის დაზიანებები მიაყენა ქალა-ტვინის ბლაგვი ტრავმის სახით, რამაც მცირეწლოვანი გოგონას ტვინის მკვეთრი შეშუპება და სისხლჩაქცევა გამოიწვია, რის შემდეგაც ის გარდაიცვალა.
2019 წლის 25 თებერვალს ლელა ქსოვრელს წარედგინა დაზუსტებული ბრალი საქართველოს სსკ-ის 111.117-ე მუხლის მე-6 ნაწილით, რაც გულისხმობს ოჯახის წევრის ჯანმრთელობის განზრახ მძიმე დაზიანებას, რამაც მისი სიცოცხლის მოსპობა გამოიწვია, ჩადენილი წინასწარი შეცნობით არასრულწლოვნის მიმართ. ასევე, 111.126-ე მუხლის მე-2 ნაწილის “დ“ ქვეპუნქტით, რაც ოჯახის ერთი წევრის მიერ ოჯახის სხვა წევრის სისტემატურ ცემასა და ძალადობას გულისხმობს, ჩადენილი წინასწარი შეცნობით არასრულწლოვნის მიმართ და 111.381-ე მუხლის 1-ელი ნაწილით, რაც შემაკავებელი ორდერით გათვალისწინებული მოთხოვნებისა და ვალდებულებების შეუსრულებლობას გულიხმობს, ჩადენილი ოჯახის წევრის მიმართ.
გამოძიებით დადგინდა, რომ 2019 წლის 21 იანვრიდან - 22 იანვრამდე ღამის პერიოდში, ლ.ქ.-მ თავის არასრულწლოვან შვილს ნ.ზ.-ს თავის არეში მიაყენა სიცოცხლისთვის სახიფათო მძიმე ხარისხის დაზიანებები, ქალა-ტვინის ბლაგვი ტრავმის სახით. მიყენებულმა დაზიანებებმა გამოიწვია სისხლჩაქცევა და თავის ტვინის მკვეთრი შეშუპება, შედეგად 2019 წლის 22 იანვარის დილის საათებში ნ.ზ. გარდაიცვალა.
გამოძიება ასევე დაწყებულია გარდაცვლილი გოგონას 5 წლის ძმის, ლუკა ქსოვრელის სხეულზე არსებული დაზიანებების თაობაზე.
აღნიშნული საქმე ცალკე წარმოებად არის გამოყოფილი ლელა ქსოვრელის ბრალდების საქმიდან.
გამოძიება ასევე მიმდინარეობს სოციალური მუშაკების მხრიდან შესაძლო სამსახურეობრივი გულგრილობის ფაქტთან დაკავშირებით.
