ფოთის ცენტრალურ სტადიონზე სამშენებლო სამუშაოების პირველი ეტაპი დასრულდა, რომელიც ქალაქ ფოთის მერმა გოჩა კურდღელიამ მაჟორიტარ დეპუტატთან, ირაკლი ხახუბიასთან და მერის მოადგილეებთან ერთად დაათვალიერა.
ფოთის მერის გოჩა კურდღელიას თქმით, სტადიონი 1700 მაყურებელზეა გათვლილი და უმაღლესი სტანდარტის შესაბამისი მინდორია დაგებული.
„პროექტის ფარგლებში მოეწყო 1700 მაყურებელზე გათვლილი დასავლეთი ტრიბუნა, რომელიც ლითონის კონსტრუქციით გადაიხურა, შიდა და გარე კომუნიკაციები, გასახდელები, საშხაპეები, სველი წერტილები, საკონფერენციო დარბაზი, ექიმისა და დოპინგ-კონტროლის ოთახები. დაიგო უმაღლესი სტანდარტის შესაბამისი მინდვრის საფარი და დამონტაჟდა სარწყავი სისტემა, რომელიც საქართველოს ფეხბურთის ფედერაციამ განახორციელა“, - განაცხადა ფოთის მერმა გოჩა კურდღელიამ.
პროექტის ღირებულებამ 1 863 000 ლარი შეადგინა.
ფოთის ცენტრალური სტადიონის სამშენებლო სამუშაოები ტენდერში გამარჯვებულმა კომპანია შპს „ელიტა ბურჯმა“ შეასრულა.
აღნიშნულ ინფორმაციას ფოთის მუნიციპალიტეტის მერია ავრცელებს.