ოჯახში მოძალადეს, შესაძლოა, ძალადობრივი დამოკიდებულებისა და ქცევის შეცვლაზე ორიენტირებული სწავლების კურსის გავლა მოუწიოს. აღნიშნულს ითვალისწინებს ოჯახში ძალადობის მარეგულირებელ კანონმდებლობაში ცვლილებების პაკეტი, რომელიც ადამიანის უფლებათა დაცვის და სამოქალაქო ინტეგრაციის კომიტეტის თავმჯდომარის სოფო კილაძის ინიციატივით მომზადდა.

როგორც „ინტერპრესნიუსს“ სოფო კილაძემ განუცხადა, შემუშავებული ცვლილებების მიზანია, მეტი აქცენტი გაკეთდეს ძალადობრივი ქცევის ადრეულ ეტაპზე გამოვლენასა და პრევენციაზე.

„ახალი საკანონმდებლო ინიციატივის თანახმად, მოსამართლის გადაწყვეტილებით, დამცავი ორდერის გამოცემისას, მოძალადისათვის სავალდებულო გახდება ძალადობრივი დამოკიდებულებისა და ქცევის შეცვლაზე ორიენტირებული სწავლების კურსის გავლა, რათა მაქსიმალურად თავიდან იქნას აცილებული განმეორებითი ძალადობა“, - აცხადებს სოფო კილაძე.

გარდა ამისა, მსხვერპლის მიერ მოძალადის წინააღმდეგ შეტანილ სარჩელებზე სახელმწიფო ბაჟი უქმდება.

„ძალადობის წინააღმდეგ მიმართული საკანონმდებლო ცვლილებების მიხედვით, ოჯახური ძალადობის მსხვერპლი, სამოქალაქო სამართლებრივ დავებზე, სასამართლოში სახელმწიფო ბაჟისგან გათავისუფლდება. საკანონმდებლო ცვლილება მსხვერპლს საშუალებას აძლევს მაგალითად, მოძალადესთან ქონებრივი დავა, ფინანსური დანახარჯების გარეშე მაქსიმალურად სწრაფად გადაწყვიტოს“, - განაცხადა სოფო კილაძემ.

საკანონმდებლო ცვლილებები სოფო კილაძის ინიციატივით, ადამიანის უფლებათა დაცვის და სამოქალაქო ინტეგრაციის კომიტეტმა აშშ საელჩოს მხარდაჭერით მოამზადა. ინიციატივების შემუშავების პროცესში ჩართულები იყვნენ არასამთავრობო ორგანიზაციები და საერთაშორისო ორგანიზაციები.

აღნიშნული პაკეტზე იურიდიულ საკითხთა კომიტეტი 13 მაისს იმსჯელებს. მისი მიღება პარლამენტში საგაზაფხულო სესიის ფარგლებში იგეგმება.