ქართული პრესის მიმოხილვა 17.05.2019

არჩევნებამდე სამი დღით ადრე ზუგდიდი პოლიტიკური აფეთქების და დაპირისპირების ცენტრად იქცა - ვინ ცდილობს სიტუაციის დაძაბვას

ბოლო დღეებში ორი სამხედრო იპოვეს გარდაცვლილი - რა გახდა სიკვდილის მიზეზი და რას ყვებიან ახლობლები

***

არჩევნებამდე სამი დღით ადრე ზუგდიდი პოლიტიკური აფეთქების და დაპირისპირების ცენტრად იქცა - ვინ ცდილობს სიტუაციის დაძაბვას

“ხმაური და დაპირისპირება საოლქო კომისიაში 16 მაისსაც გაგრძელდა, როდესაც გაერთიანებული ოპოზიციის მიერ წარმოდგენილი ფოტო და ვიდეო მტკიცებულებები საოლქო კომისიამ არ მიიღო. ოპოზიციის თქმით, მათ აქვთ დამადასტურებელი მასალა იმის, რომ საარჩევნო სიები და სარეგისტრაციო ბეჭდები კონკრეტული პირების სახლებში ინახება. ოპოზიციური პარტიის წარმომადგენლებს არ მისცეს საშუალება სხდომაზე ეჩვენებინათ ის მოპოვებული ფოტო და ვიდეო მტკიცებულებები, რომელშიც, მათი მტკიცებით, ასახულია, რომ კომისიიდან გატანილი სიები და ბეჭდები კონკრეტულ პირებს სახლში ჰქონდა” , - წერს გაზეთი "რეზონანსი“ სტატიაში სათაურით, არჩევნებამდე სამი დღით ადრე ზუგდიდი პოლიტიკური აფეთქების და დაპირისპირების ცენტრად იქცა - ვინ ცდილობს სიტუაციის დაძაბვას

"ზუგდიდის 67-ე საოლქო საარჩევნო კომისიის თავმჯდომარე მირანდა მესხმა გაერთიანებულ ოპოზიციას არ მისცა საშუალება ეს საკითხი განხილვაზე დამდგარიყო. ასევე ოპოზიცია ითხოვდა კენჭისყრაზე დამდგარიყო მირანდა მესხის თანამდებობიდან გადაყენების საკითხი, თუმცა თავმჯდომარემ სხდომა ისე დაასრულა, რომ ოპოზციის არცერთი მოთხოვნა არ გაითვალისწინა. ხელისუფლების ოპონენტები მირანდა მესხს არაკანონიერ ქმედებებში ადანაშაულებენ. მათი თქმით, ცენტრალური საარჩევნო კომისია პოლიტიკურ დავალებებს ასრულებს და დირექტივები საოლქო კომისიების მისამართითაც გაიცემა. ოპოზიციის განცხადებით, მესხი თამარ ჟვანიას შვილის ნათლიაა. „ქალბატონმა მირანდამ თანამდებობა აუცილებლად უნდა დატოვოს. მირანდა და ჟვანია ახლობლები არიან და დიდი ხანია ერთმანეთთან კავშირი აქვთ. მიუხედავად იმისა, რომ ეს ქალბატონი გაყალბებაში, სისხლის სამართლის დანაშაულში, არაერთხელ არის მხილებული, ჟვანიამ პირადად გადააყენოს, მოხსნას და მის საქციეზე პასუხისმგებლობა თავადვე აიღოს. ყველა საუბნო საარჩევნო კომისიის თავმჯდომარე მინდა გავაფრთხილო, ვუთხრა და ვურჩიო, რომ არავითარ შემთხვევაში არ ჩაყვნენ ამ სისხლის სამართლის დანაშაულში ქალბატონ მირანდას,“ - აცხადებს „რეზონანსთან“ ხატია დეკანოიძე“, - აღნიშნავს გამოცემა.

"ოპოზიციის განცხადებით, „ქართულმა ოცნებამ“ არჩევნების გაყალბების მექანიზმი ჩამოაყალიბა, რომელიც ნათელ-მირონობას და ახლობლობას გულისხმობს. დეკანოიძე აცხადებს, რომ მოიარეს ძალიან ბევრი საუბნო საარჩევნო კომისია და კომისიის თავმჯდომარეები პირდაპირ ამბობენ, რომ რეალურად ბეჭდები სარეგისტრაციო ჰქონდათ სახლში, სიები ჰქონდათ სახლში, იმიტომ რომ შესაბამისი ინფრასტრუქტურა არ გააჩნიათ, ეს იყო საოლქო საარჩევნო კომისიის თავმჯდომარის უშუალო ბრძანება და რეალურად კანონია დარღვეული. ცესკო კი საოლქო საარჩევნო კომისიის თავმჯდომარის პასუხისმგებლობის საკითხს არ განიხილავს. „საოლქო საარჩევნო კომისიის თავმჯდომარის მიერ მიღებული გადაწყვეტილება არის სრულ შესაბამისობაში საქართველოს კანონმდებლობასთან. მისი გადაგომის არანაირი აუცილებლობა და რაც მთავარია, სამართლებრივი წინაპირობა არ არსებობს,“ - განაცხადა ცესკოს სპიკერმა, ანა მიქელაძემ. თამარ ჟვანია კი მზად არის, რომ პარლამენტში მივიდეს და ოპოზიციის კითხვებს უპასუხოს. "მინდა გამოვეხმაურო ინტერპელაციის წესით პარლამენტში დაბარების შესახებ გავრცელებულ ინფორმაციას და აღვნიშნო, რომ როგორც ყოველთვის, მზად ვარ, ნებისმიერ შეკითხვას გავცე პასუხი. უფრო მეტიც, მნიშვნელოვანია და ჩვენს ინტერესშია, საზოგადოებას მივაწოდოთ ზუსტი ინფორმაცია. ყოველთვის მივესალმები დიალოგს ნებისმიერი ფორმით!" - წერს "ფეისბუქში" თამარ ჟვანია“, - დასძენს გამოცემა.

"მმართველი გუნდი ზუგდიდში განვითარებულ მოვლენებზე პასუხისმგებლობას კი ოპოზიციას აკისრებს. ამის შესახებ განცხადება პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ გააკეთა. სოფო კილაძის შეფასებით ადგილი აქვს ოპოზიციის მხრიდან დესტრუქციულ ქმედებებს. ის ოპონენტებს მოუწოდებს ხელი არ შეუშალონ არჩევნების მშვიდ გარემოში ჩატარებას. “სამწუხაროდ, ჩვენ ვხედავთ რომ ტემპერატურა არის მაღალი პოლიტიკური და მაქსიმალურად უნდა შეეცადოს ოპოზიციაც ასევე იმიტომ რომ ვხედავთ, რომ გარკვეულ დესტრუქციულ ქმედებებს აქვს ადგილი. ოპოზიციაც უნდა შეეცადოს რომ ეს არჩევნები იყოს დემოკრატიულად წარმართული და არ ჰქონდეს ადგილი პროვოკაციებს, არ ჰქონდეს ადგილი ერთმანეთთან დაპირისპირებას იმიტომ, რომ საბოლოო ჯამში ეს უკვე ქვეყნის იმიჯზე აისახება შემდეგ. ამიტომ ყველა მხარე ვალდებულია დაიცვას კანონი. თუ ვინმე დაარღვევს ამ კანონს ამას ექნება შესაბამისი რეაგირება,“-განაცხადა სოფო კილაძემ“, - წერს სტატიის ავტორი.

ბოლო დღეებში ორი სამხედრო იპოვეს გარდაცვლილი - რა გახდა სიკვდილის მიზეზი და რას ყვებიან ახლობლები

"ბოლო დღეებში ერთმანეთის მიყოლებით ორმა საკონტრაქტო სამხედრო მოსამსახურემ, სავარაუდოდ, სიცოცხლე თვით მკვლელობებით დაასრულა. რასთან გვაქვს საქმე რეალურად, თვითმკველობასთან, უბედურ შემთხვევასთან თუ მკვლელობასთან? სანამ ექსპერტიზის შედეგები არ გახდება ცნობილი და გამოძიება არ დასრულდება, რთულია კონკრეტულად რაიმეზე საუბარი. თუმცა გარდაცვლილების ოჯახებს თვითმკვლელობის ვერსიის ნაკლებად სჯერათ. 15 მაისს ეროვნული გვარდიის მე-10 კადრირებული ბრიგადის საკონტრაქტო სამხედრო მოსამსახურე პაატა ჩხაიძემ არასამსახურებრივ ვითარებაში, საცხოვრებელ ბინაში, სავარაუდოდ, სიცოცხლე თვითმკვლელობით დაასრულა. ის გარდაცვლილი საკუთარ ოთახში იპოვეს. ამის შესახებ ინფორმაციას საქართველოს თავდაცვის სამინისტრო ავრცელებს“, - წერს გაზეთი "რეზონანსი“ სტატიაში სათაურით, ბოლო დღეებში ორი სამხედრო იპოვეს გარდაცვლილი - რა გახდა სიკვდილის მიზეზი და რას ყვებიან ახლობლები

„უწყების ცნობით, შემთხვევის ადგილზე საცხოვრებელ სახლში ნაპოვნია ცეცხლსასროლი იარაღი (სანადირო თოფი), რომლითაც, სავარაუდოდ, ჯარისკაცმა თავი მოიკლა. გამოძიება დაწყებულია სსკ-ის 115-ე მუხლის პირველი ნაწილით, რაც თვითმკვლელობამდე მიყვანას გულისხმობს. კიდევ ერთი საკონტრაქტო სამხედრო მოსამსახურე კი 12 მაისს, ვაზიანის საველე წვრთნების ბაზაზე იპოვეს გარდაცვლილი. ამ შემთხვევაზეც საქმე აღძრულია იგივე მუხლით. თავდაცვის სამინისტროს განცხადებით, 12 მაისს ვაზიანის საველე წვრთნების ბაზაზე სახმელეთო ჯარების დასავლეთ სარდლობის მესამე ქვეითი ბრიგადის 31-ე ბატალიონის საკონტრაქტო სამხედრო მოსამსახურე გარდაცვლილი იპოვეს. გარდაცვლილი 25 წლის ვლადიმერ მახათაძეა“, - აღნიშნავს გამოცემა.

"სამინისტროს განცხადებით, მიმდინარეობს საგამოძიებო და ოპერატიული ღონისძიებები. ვაზიანის ბაზაზე გარდაცვლილი სამხედრო მოსამსახურე ვანის მუნიციპალიტეტის მკვიდრია. ვლადიმერ მახათაძე სოფელ შუამთაში ცხოვრობდა. ახლობლების ინფორმაციით, ის ჯარში რამდენიმე თვეა, რაც მსახურობდა. ახლობლებს და მეზობლებს თვითმკვლელობის ვერსიის არ სჯერათ. გარდაცვლილის ოჯახში ჯერჯერობით კომენტარს არ აკეთებენ. ისინი გამოძიებას დაელოდებიან. მახათაძე 16 მაისს დაკრძალეს. სოფელში ჯარისკაცის თვითმკვლელობის არავის სჯერა. მათი აზრით ახალგაზრდას ამის მიზეზი არ ჰქონდა. ამავე დროს, სოფელ შუამთის რწმუნებული ნოე გობაძე „რეზონანსთან“ ამბობს, რომ ის ოჯახს კარგად იცნობს და მათი მხრიდან რაიმე ეჭვებზე საუბარი არ ყოფილა. გამგებელი ფიქრობს, რომ ახალგაზრდა ჯარისკაცმა სიცოცხლე თვითმკვლელობით დაასრულა და მისთვის გაუგებარია სოფელში ასეთი ინფორმაცია რის საფუძველზე გაჩნდა. „არ ვიცი, თქვენგან პირველად მესმის, რომ ეს ეჭვები არსებობს. გარდაცვლილის ბიძასაც ვიცნობ და მის ოჯახსაც, მსგავსი საუბარი, რომ სხვა რამეზე აქვთ ეჭვი, არ გამიგონია. გამოძიება მიმდინარეობს და ალბათ დადგინდება სიმართლე, რა მოხდა. არ ვიცი ვერ გეტყვით, მას ჰქონდა თუ არა სუიციდის მიზეზი, ეს მისმა ოჯახმაც არ იცის. მე მითუმეტეს წინასწარ რაც არ ვიცი იმაზე ვერ ვისაუბრებ“, - აცხადებს „რეზონანსთან“ ნოე გობაძე“, - განაგრძობს გამოცემა.

"გარდაცვლილის მეზობელი გენადი ნაფტვერიძე ამბობს, რომ არსებობს ჩანაწერი, სადაც ჩანს როგორ შედის გარდაცვლილი იარაღის საწყობში. ის საწყობში სამჯერ შევიდა და ეტყობა, რომ ნერვიულობს. ნეფტვერიძე აცხადებს, რომ მახათაძეს არც ბანკის ვალები და რაიმე სხვა ფინანსური ვალდებულებები ჰქონდა, მითუმეტეს აზარტული თამაშით დაინტერესებული არასდროს ყოფილა. არ იყო კონფლიქტური და არასდროს ჰქონია სუიციდისკენ მიდრეკილება. მეზობელი ამბობს, რომ მას უმაღლესი განათლება ჰქონდა მიღებული და იმის გამო რომ სამსახური ვერსად იშოვა, შარშან გადაწყვიტა საკონტრაქტო სამსახურზე წასულიყო. „ამბობენ, რომ არსებობს ჩანაწერი, სადაც ჩანს, როგორ შედის სამჯერ იარაღის საწყობში, ამის შემდეგ კი გარდაცვლილი იპოვეს. სრულიად გამორიცხულია, რომ მას სუიციდის მიზეზი ჰქონოდა. საკმაოდ კარგი და განათლებული ახალგაზრდა იყო. ვერსად სამსახური ვერ იშოვა და შარშან გადაწყვიტა საკონტრაქტო სამსახურში წასულიყო. არც ბანკის ვალები ჰქონია და არც სხვა რაიმე ფინანსური პრობლემები. თამაში ხომ საერთოდ გამორიცხულია. ასეთ ახალგაზრდას მეორეს ვერსად ნახავდით. ყველა შოკშია, წარმოდგენა არავის აქვს, რა შეიძლება გამხადრიყო თვითმკვლელობის მიზეზი“, - აცახდებს გარდაცვლილის მეზობელი. თავდაცვის სამინიტროს ოფიციალური პირების განცხადებით, ბოლო წლებში, სუიციდის მიზეზი ჯარში ხშირად აზარტულ თამაშებზე დამოკიდებულება (გემბლინგი) და აქედან დაგროვილი ვალებია. ასევე დეპრესია, რომელიც ფსიქოლოგიურ პრობლემებთან არის კავშირში. მაგალითად რამდენიმე წლის წინ, ერთ-ერთმა წვევამდელმა თავი ტოტალიზატორ „აჭარაბეთის“ შენობასთან მოიკლა. ამის შემდეგ, შეიარაღებული ძალების სამხედროებს აზარტული თამაშები საერთოდ აეკრძალათ. თუმცა სამხედროე ექსპერტები ჯარში ბოლო დროს ხელმძღვანელობის მხრიდან ხშირად ძალადობის ფაქტებზე საუბრობენ, რის დამალვის მცდელობაც თავდაცვის სამინისტროს არაერთხელ ჰქონია. თავდაცვის ყოფილი მინისტრი დიმიტრი შაშკინი „რეზონანსთან“ ამბობს, რომ ოჯახების უნდობლობა სამინისტროს მიმართ იმით არის განპირობებული, რომ ჯარში სიტუაცია საკმაოდ მძიმეა, ბოლო დროს მომხდარი არცერთი ფაქტი გამოძიებული არ არის და მასზე რეალური ინფორმაცია არავის აქვს. „ახლა ჯარში სრული ბარდაკი და განუკითხაობაა. არ ხდება ჯარისკაცების არც ნორმალური კვება, არც ვარჯიში, ოფიცრები აღარ არიან თავისი ქცევით და დისციპლინით ჯარისკაცების მაგალითი. თავდაცვის სამინისტროდან გაყარეს კვალიფიციური კადრები. ავღანეთის, ერაყის და საქართველოს ომის მონაწილეები, ოფიცრები და გენერლები ქუჩაში გამოუშვეს“, - დასძენს გამოცემა.

"არაპროფესიონალიზმის პიკია. ხდება ჯარისკაცებზე ძალადობა, ფულის გამოძალვა და ათასი უბედურება, რომელსაც იზორია გამუდმებით მალავს. მესმის გარდაცვლილების ოჯახების უნდობლობის, მაგრამ რომ ვურჩიო პროკურატურას მიმართონ, რა აზრი აქვს? არც ეს უწყება არაფერს არ გამოიძიებს. ყველა ასეთ ფაქტზე სამხედრო პოლიცია საქმეს 115-ე თვითმკვლელობამდე მიყავნის მუხლით აღძრავს. აბა, მოიკითხეთ, რეალურად რომელიმე მსგავსი საქმე გამოძიებულა? "თავდაცვის სამინისტროს ჰგონია, რომ თუ ასეთ ფაქტებს დამალავს, ამით ჯარის იმიჯს გადაარჩენს. არადა პირიქით ხდება, სიტუაცია კიდევ უფრო მძიმდება. ეს ჯარში დაუსჯელობის სინდრომს აჩენს და მსგავსი ფაქტები კვლავ მეორდება“, - აცხადებს თავდაცვის ყოფილი მინისტრი „რეზონანსთან“. შაშკინი ამბობს, რომ დღეს ჯარს მართავენ ადამიანები, რომლებსაც ავტორიტეტი არა აქვთ, კორუფციაში არიან ჩართულები და ქართული ჯარის სრულ დეგრადაციას ახორციელებენ. მისი თქმით, თუ ჯარში რამე დანაშაული ან პრობლემა ხდება, ბოლო პერიოდში მუდმივად იმით არიან დაკავებულები, რომ გარდაცვლილი ან ძალადობის მსხვერპლი ჯარისკაცების ოჯახები გააჩუმონ. მისი თქმით, ჯარის დისციპლინა დაუსჯელობის არარსებობაზე დგას. დანაშაულის დაფარვა და მიჩუმათება ჯარში დაპირისპირებას კიდევ უფრო აღვივებს, რაც წესრიგის სრულად მორღვევას იწვევს“, - წერს სტატიის ავტორი.

ვალერი სოლოვეი - კრემლის ქმედებების მოაზროვნე გამმართლებლები, ვინც საქართველოს საქმეებში ჩახედულია, თვლიან, რომ რუსეთს აღარ შეუძლია საქართველოს  პოლიტიკაზე გავლენის მოხდენა
ქართული პრესის მიმოხილვა 21.08.2019
ვახტანგ ძაბირაძე -  შემოდგომა იქნება ოპოზიციურ ფლანგზე ძალების ჩამოყალიბების პროცესი, ამიტომ არ მაქვს მოლოდინი, რომ ცხელი შემოდგომა გვექნება
პროექტ „ბათუმი რივიერასთან“ დაკავშირებით „სილქროუდ ჯგუფი“ განცხადებას ავრცელებს