ზუგდიდის ტელევიზიის წამყვანი დადიანების სასახლის ეზოში მომხდარ ინციდენტთან დაკავშირებით პასუხისგებაში მისცეს

ზუგდიდის ადგილობრივი ტელევიზიის „ოდიშის“ წამყვანი, ლევან თორია შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის ზუგდიდის რაიონული სამმართველოს თანამშრომლებმა პასუხისგებაში მისცეს.

როგორც "ინტერპრესნიუსს" შინაგან საქმეთა პრესსამსახურიდან აცნობეს, თორიას ბრალი ძალადობის ფაქტზე, სისხლის სამართლის კოდექსის 126-ე მუხლის პირველი ნაწილით წარედგინა. მათივე ცნობით, გამოძიებით დადგინდა, რომ ბრალდებულმა ლევან თორიამ მიმდინარე წლის 14 მაისს, ზუგდიდში დადიანების სასახლის ეზოში ფიზიკური შეურაცხყოფა მიაყენა მოქალაქეს.

ფაქტთან დაკავშირებით ამ დროისთვის გრძელდება საგამოძიებო მოქმედებები.