მარჯანიშვილის თეატრის მიმდებარედ კაფის ინვენტარის დაზიანების ფაქტზე პოლიციამ ორი პირი დააკავა. არსებული ინფორმაციით, ორ მამაკაცს შორის დაწყებული შელაპარაკება ჩხუბში გადაიზარდა, რა დროსაც ერთ-ერთი კაფის ვიტრინა დაზიანდა. მათ ასევე ადგილზე მისულ სამართალდამცველებსაც გაუწიეს წინააღმდეგობა.

როგორც „ინტერპრესნიუსს“ შსს-ში განუცხადეს, ერთი პირი ადმინისტრაციული, ხოლო მეორე სისხლის სამართლის წესითაა დაკავებული.

„შინაგან საქმეთა სამინისტროს საპატრულო პოლიციის დეპარტამენტის თანამშრომლებმა, მარჯანიშვილზე მომხდარ ინციდენტთან დაკავშირებით ორი პირი დააკავეს. ერთ-ერთი პირი დაკავებულია ადმინისტრაციულ სამართალდაღვევათა კოდექსის 166-ე და 173-ე მუხლებით, რაც წვრილმან ხულიგნობას და პოლიციელის კანონიერი მოთხოვნის დაუმორჩილებლობას გულისხმობს ხოლო, მეორე პირი სისხლის სამართლის კოდექსის 353-ე და 187-ე მუხლებით, რაც პოლიციელის წინააღმდეგობას და სხვისი ნივთის დაზიანებას ან განადგურებას გულისხმობს. დანიშნულია შესაბამისი ექსპერტიზები და მიმდინარეობს საგამოძიებო მოქმედებები“, - აცხადებენ შსს-ში.