ასეთი დეზინფორმაციის გავრცელება ნიშნავს, რომ მათ კარგად იციან, ვის უჭერს მხარს მთაწმინდის მოსახლეობა, - ასე ეხმაურება საპარლამენტო უმრავლესობის წევრი დავით მათიკაშვილი „ევროპული საქართველოს" ლიდერების მიერ გაკეთებულ განცხადებას, რომლის თანახმად, „ქართული ოცნება“ ხმების მობილიზების მიზნით, პატიმრებისა და მათი ოჯახების მდგომარეობის გამოყენებას ცდილობს.
დავით მათიკაშვილის განცხადებით, აღნიშნული ბრალდება საარჩევნო გარემოს დისკრედიტაციას ისახავს მიზნად.
„ეს არის „ნაციონალური მოძრაობის" ხელწერა, რომ მოახდინოს საარჩევნო პროცესის დისკრედიტაცია. ასეთ განცხადებებს ვისმენდით ყველა არჩევნებზე, მაგრამ როგორც წესი, ეს არ დასტურდებოდა. ისინი ცდილობენ არასწორი, გადამეტებული და გაფერადებული ინფორმაციებით მოატყუონ საზოგადოება. ჩვენ გვაქვს უპრეცედენტოდ ღია და გამჭირვალე არჩევნები მთაწმინდაზე. ასეთი დეზინფორმაციების გავრცელება ნიშნავს, რომ მათ კარგად იციან ვის უჭერს მხარს მთაწმინდის მოსახლეობა",- განაცხადა დავით მათიკაშვილმა.