თავდაცვის სამინისტროს გუნდი „არმია“ მინი-ფეხბურთის ტურნირის ოქროს ლიგა 2018-19 სეზონის გამარჯვებულია. ამის შესახებ ინფორმაციას თავდაცვის სამინისტრო ავრცელებს.
მათი ცნობით, თავდაცვის მინისტრმა ლევან იზორიამ „არმიას“ ფეხბურთელებს შეჯიბრში გამარჯვება მიულოცა.
ლევან იზორია ფეხბურთელებს პირადად გაესაუბრა და მიღწეული წარმატებისთვის მათ მადლობა გადაუხადა. მინისტრმა ფეხბურთელებს ესპანეთის დედაქალაქ მადრიდში 15-16 ივნისს დაგეგმილ მინი-ფეხბურთის სამოყვარულო ჩემპიონატში EFBLU European Tour 3 2019-ში მონაწილეობის შესახებ გადაწყვეტილებაც აცნობა.
საქართველოს თავდაცვის სამინისტროს გუნდი "არმია", რომელიც სამხედრო მოსამსახურეებით არის დაკომპლექტებული, მინი-ფეხბურთის ტურნირში ოქროს ლიგა 2018-19 სეზონის ფინალში გავიდა, სადაც ფინანსთა სამინისტროს შემოსავლების სამსახურის გუნდი "RS" ანგარიშით 6:3 დაამარცხა და ტურნირის ჩემპიონობა მოიპოვა. „არმიის“ ფეხბურთელებმა შეჯიბრის საუკეთესო მეკარის და საუკეთესო ფეხბურთელის ნომინაციაშიც გაიმარჯვეს.
თავდაცვის სამინისტროს მინი-ფეხბურთის გუნდი „არმია“ 2016 წელს შეიქმნა და წელს უკვე მესამე სეზონია, რაც ოქროს ლიგაში ასპარეზობს.
ოქროს ლიგა 2018-19 სეზონი თბილისის ოლიმპიურ სასახლეში გაიმართა და მასში მონაწილეობა სახელმწიფო უწყებების და კერძო კომპანიების გუნდებმა მიიღეს. შეჯიბრი სპორტული სააგენტო SBM-ის ორგანიზებით ჩატარდა.