გერმანელი დეპუტატის აზრით, ევროპამ „სამხრეთ ოსეთის“ დამოუკიდებლობა უნდა აღიაროს

ბერლინის რეგიონალური პარლამენტის დეპუტატის გუნარ ლინდემანის განცხადებით, რომელიც ე.წ. სამხრეთ ოსეთში „საპარლამენტო არჩევნებზე“ საერთაშორისო დამკვირვებლის სტატუსით იმყოფება, ევროპამ დღევანდელი „არჩევნების“ ლეგიტიმურობა და „რესპუბლიკის“ დამოუკიდებლობა უნდა ცნოს. ამის შესახებ ადგილობრივი სააგენტო „რეს“-ი იუწყება.

„საჭიროა დასავლეთ ევროპის ქვეყნებისადმი მიმართვა მოწოდებით, აღიარონ ჩატარებული არჩევნების ლეგიტიმურობა, ასევე სამხრეთ ოსეთის დამოუკიდებლობა“, - განაცხადა ლინდემანმა.

გერმანელი პოლიტიკოსის თქმით, „სამხრეთ ოსეთში“ არჩევნები დემოკრატიულად მიმდინარეობს.