იემენში მიმდინარე რელიგიურ-სამოქალაქო ომის მონაწილე მხარემ, შიიტური ისლამის მიმდევარმა ჰუსიტებმა რაკეტა საუდის არაბეთის ტერიტორიაზე, ორი სახელმწიფოს საზღვრიდან 200 კილომეტრით დაშორებულ სამოქალაქო აეროპორტ აბხას ესროლეს. „როიტერსის“ ინფორმაციით, დაშავებულია 26 ადამიანი, მათ შორის სამი ქალი და ორი ბავშვი, დაზიანდა შენობაც.
8 კაცი საავადმყოფოში გადაიყვანეს. დანარჩენებს სამედიცინო დახმარება ადგილზე აღმოუჩინეს.
საუდის არაბეთი იმ სამხედრო ალიანსის ლიდერია, რომელიც იემენში მხარს უჭერს სუნიტების ალიანსს. ამ კოალიციას მხარს უჭერს დასავლეთიც. ალიანსის წარმომადგენლებმა განაცხადეს, რომ მკაცრ პასუხს გასცემენ სამოქალაქო აეროპორტზე თავმდამსხმელებს. სუნიტების აზრით, ამ ინციდენტმა ნათლად დაადასტურა ირანის მიერ შიიტი ჰუსიტების მხარდაჭერა.