იმის შემდეგ რაც მოვისმინეთ, რომ 2012 წელი თურმე ხარვეზიანი ყოფილა და დაპირებებს თურმე შესრულება არ უწერია, ვფიქრობ, ეთიკის საბჭოზე პირველ რიგში, „ქართული ოცნების“ საქმეა განსახილველი და მისი პარლამენტის თავმჯდომარის, - განაცხადა დამოუკიდებელმა დეპუტატმა დავით ჭიჭინაძემ. მისივე თქმით, „ოცნების“ წარმომადგენლებმა მოახერხეს ის, რომ მათი სიტყვა აღარ არის წონადი.
„ამიტომაც როცა არგუმენტები არ აქვთ, გადადიან კუნთებსა და მუშტებზე, პირველყოფილ მეთოდებს მიმართავენ. მოკლედ, სანქცია არ უშველის არაფერს. აღარავის სჯერა მათი სიტყვების და არაფრით არ განსხვავდებიან „ნაციონალური მოძრაობისგან“. თანაც, წესრიგის დამყარება არ ხდება შეზღუდვით. წესრიგის დამყარება ხდება წესიერი საქციელით და არა ვიღაცის მოგონილი სანქციებით. უკულტურო დეპუტატს არანაირი ეთიკის საბჭო არ უშველის და ეს მხოლოდ თამაშია.
ისე, მივლინებაში მეც მივდიოდი ყაზახეთში, დამკვირვებლად, მაგრამ პარლამენტის თავმჯდომარემ ამიკრძალა. ასე რომ, დიდი დანაკარგი არ არის. ზოგადად, თვითონ ფაქტია ყველაზე არაეთიკური, როცა შენი საკითხი ეთიკის საბჭოზე გადის“, - აღნიშნა დავით ჭიჭინაძემ.