დედაქალაქში არსებულ მეწყერსაშიშ ზონებში მშენებლობების ნებართვები, პროექტების დამტკიცების მიუხედავად, არ გაიცემა, - ამის შესახებ თბილისის მერმა კახა კალაძემ ჟურნალისტებს დასმული კითხვის საპასუხოდ განუცხადა.

როგორც კალაძემ აღნიშნა, მონიშნულია კონკრეტული ლოკაციები, მათ შორის ჟვანიასა და შეშელიძის ქუჩებზე, სადაც მშენებლობების ნებართვები არ გაიცემა.

„არის ლოკაციები, სადაც მოკვლევები გვაქვს დაწყებული, მაგალითად, შეშელიძის ქუჩა არის ერთ-ერთი პრობლემური, მეწყერსაშიში ზონა, სადაც დავიწყეთ ადამიანების განსახლება და უახლოეს მომავალში დავიწყებთ სამუშაოებს, დატერასებას, რომ ეს პრობლემა მოგვარდეს და ყველანაირი რისკი ავიცილოთ თავიდან. რაც შეეხება ჟვანიას ქუჩას, ამაზე კვლევა ჩატარებულია და გვაქვს სრული ინფორმაცია, ვიცით კონკრეტული ადგილები, რომელიც საშიშია და ქალაქის ურბანული განვითარებისთვის პრობლემას წარმოადგენს. ამ ადგილებში მშენებლობების ნებართვები, რომელიც მზად იყო გასაცემად, დამტკიცებული იყო პროექტები, არის გრგ-ები, ხელოვნურად გვქონდა გაჩერებული და ველოდებოდით ამ კვლევას, მინდა ვუთხრა ამ ადამიანებს, რომ აქ მშენებლობის ნებართვებს ვერ გავცემთ. ადამიანების უსაფრთხოება არის ჩვენთვის ძალიან მნიშვნელოვანი. სხვა ადგილებზეც მიმდინარეობს მოკვლევა",- განაცხადა კალაძემ.