ტერორისტული ორგანიზაციის „ისლამური სახელმწიფოს“ მებრძოლების 6 დაობლებული ბავშვი, რომლებიც სირიის ჩრდილო-აღმოსავლეთის ტერიტორიაზე „სირიის დემოკრატიული ძალების“ ბანაკებში იმყოფებოდნენ, ბელგიამ მიიღო. ამ ცნობას „როიტერის“ ბეირუთის ოფისი ავრცელებს. სავარაუდოდ, ეს ბავშვები არიან ბელგიის იმ მოქალაქეების შვილები, რომლებიც „ისლამურ სახელმწიფოს“ მიემხრნენ და დაიღუპნენ. „სირიის დემოკტარიული ძალები“ ამბოხებულთა ის ნაწილია, რომელთა უკანაც აშშ და დასავლეთის სხვა სახელმწიფოები დგანან და რომელთა შეიარაღებული ძალებიც უმთავრესად ეთნიკური ქურთებით არის დაკომპლექტებული.
„სირიის დემოკრატიული ძალების“ ოფიციალური წარმომადგენელი მუსტაფა ბალი „ტვიტერის“ მეშვეობით მიესალმა ბელგიის ამ ნაბიჯს და განაცხადა, რომ ეს უნდა შეეხოთ არა მხოლოდ ბავშვებს, არამედ გადატვირთულ ბანაკებში და ციხეებში მყოფ მამაკაცებსაც და ქალებსაც. „სირიის დემოკრატიული ძალების“ წარმომადგენლები დიდი ხანია აცხადებენ, რომ დიდხანს ვეღარ დაიტოვებენ „ისლამური სახელმწიფოს“ ტყვედჩავარდნილ წევრებს და მათ ოჯახებს, რომელთა დიდი ნაწილი უცხოელი ან საერთოდ მოქალაქეობის არმქონე პირია.