წინა კვირას, პარლამენტში, პროპორციულ საარჩევნო სისტემასთან დაკავშირებით 239 ათასი ხელმოწერა შევიტანეთ, რაზეც უმრავლესობის წევრები ქილიკობდნენ - დღეს უკვე აქეთ გვეხვეწებიან, ოღონდაც საპროტესტო გამოსვლები ჩააცხრონ, - ამის შესახებ “ინტერპრესნიუსს“ ფრაქცია “ნაციონალური მოძრაობის“ თავმჯდომარემ რომან გოცირიძემ განუცხადა.

მისივე თქმით, ხელისუფლებამ მოთხოვნები არ შეასრულა და ის, რაც მოხდა, არის შუალედური გამარჯვება.

“პროტესტი გაგრძელდება მანამდე, სანამ არ დაისჯებიან დამნაშავეები. უნდა აგონ პასუხი პოლიტიკურად და სამართლებრივად. შინაგან საქმეთა მინისტრი გახარია დაუყოვნებლივ უნდა გადადგეს! რაც შეეხება რეპრესიების დაანონსებას, ბიძინა ივანიშვილი თითსაც ვერავის დააკარებს. მიიღებს გაასმაგებულ პროტესტს!

პარლამენტის უმრავლესობას არა აქვს მორალური უფლება იმ დარბაზში დაბრუნების, სადაც კომუნისტი გავრილოვი დაგვასვეს თავზე. იქ შესვლის ბილეთი არის საკონსტიტუციო ცვლილებებზე მუშაობის დაწყება და გახარიას გადადგომის შესახებ დაწერილი განცხადების დადება ტრიბუნაზე“, - აცხადებს რომან გოცირიძე.

“ქართული ოცნების“ ინიციატივით, 2020 წლის საპარლამენტო არჩევნები პროპორციული საარჩევნო სისტემით, ნულოვანი ბარიერის პირობებში ჩატარდება.