ოპოზიცია ადრეც არაერთხელ იმუქრებოდა, როდესაც ბატონი გახარია მოვიდოდა პარლამენტში, მაგრამ ჩვენ მაშინ ვნახეთ პოლიტიკური დებატები, რომელიც რეალურად მინისტრ გახარიას გამარჯვებით დასრულდა, - ამის შესახებ პარლამენტის თავმჯდომარემ არჩილ თალაკვაძემ ჟურნალისტებს განუცხადა, რითაც ის ოპოზიციის განცხადებებს გამოეხმაურა, რომ ისინი შს მინისტრს პარლამენტში შემოსვლის საშუალებას არ მისცემენ.

არჩილ თალაკვაძის თქმით, მინისტრის მხრიდან გამოჩენილი მზაობა, მოვიდეს პარლამენტში და გასცეს პასუხი არსებულ კითხვებს, მისასალმებელია.

„შს მინისტრმა ღიად გამოთქვა სურვილი, რომ პარლამენტში მოხდეს ყველა იმ კითხვის განხილვა, რომელიც შესაძლოა აქვს ოპოზიციას და საზოგადოებას. ასეთი გახსნილობა და მინისტრის მზადყოფნა ძალიან კარგია. ოპოზიცია ადრეც არაერთხელ იმუქრებოდა, როდესაც ბატონი გახარია მოვიდოდა პარლამენტში, მაგრამ ჩვენ ვნახეთ პოლიტიკური დებატები, რომელიც რეალურად მინისტრ გახარიას გამარჯვებით დასრულდა. ამ შემთხვევაში მომართვა სახეზეა. ეს იყო საჯარო განცხადება, გვექნება განხილვა და მივიღებთ გადაწყვეტილებას. იცით, რომ ეს არის ბოლო სასესიო კვირა, საკმაოდ მნიშვნელოვანი საკითხები და დატვირთული დღის წესრიგია. მათ შორის ისეთი საკითხები, როგორიცაა მთავრობის წლიური ანგარიში“, - განაცხადა არჩილ თალაკვაძემ.